اسلام آباد۔ 20 جون (اے پی پی) وزیراعظم دے معاونِ خصوصی برائے صنعت تے پیداوار ہارون اختر خان آکھیا جو حکومت ولوں متعارف کرائی ڳئی قومی انرجی وہیکل پالیسی 2025-30 پاکستان کیتے ہک تاریخی اتے انقلابی قدم اے جو نہ صرف ماحولیاتی تحفظ، بلکہ صنعتی ترقی اتے توانائی دے شعبے وچ خود کفالت دی بنیاد رکھیسی۔اے ڳالھیں انہاں جمعہ کوں تھیوݨ آلی ہک ورکشاپ نال خطاب کریندیں ہوئیں آکھی جئیں وچ ماہرین، صنعت کاراں، ماحولیاتی اداریاں اتے سرمایہ کاراں شرکت کیتی۔ ہارون اختر خان آکھیا جو وزیراعظم شہباز شریف دا ویژن ہے جو 2030 تئیں پاکستان وچ وکݨ آلیاں 30 فیصد نویاں ڳاݙیاں الیکٹرک ہوون۔ ایں ہدف کیتے وفاقی حکومت ہک جامع حکمت عملی ٻݨائی اے جو سبسڈی، انفراسٹرکچر، صنعتی پیداواری استعداد، اتے ماحولیاتی اہداف تے مشتمل اے۔انہاں آکھیا جو پالیسی تے عمل درآمد دے نتیجے وچ سالانہ 4.5 ملین ٹن کاربن ڈائی آکسائیڈ دے اخراج ڳھٹ تھیسی، 1 ارب ڈالر تئیں دی بچت تیل دی درآمدات اچ متوقع اے، 405 ارب روپے سالانہ صحت دے شعبے وچ ماحولیاتی آلودگی توں بچاؤ دے ضمن وچ بچت تھیسی، 126 ٹیرا واٹ آور اضافی بجلی دا مؤثر استعمال ممکن ٻݨایا ویسی۔انہاں آکھیا جو پالیسی دے تحت عوام کوں وی براہ راست سبسڈی ݙتی ویندی پئی اے۔ ݙو پہیاں آلیاں الیکٹرک ڳاݙیاں تے 65,000 روپے سبسڈی، ترائے پھیتے آلیاں ڳاݙیاں تے 400,000 روپے سبسڈی، چار پھیتے آلیاں ڳاݙیاں تے 15,000 روپے فی کلوواٹ آور دے حساب نال سبسڈی ݙتی ویسی۔ ہارون اختر خان ݙسایا جو 2025 تئیں پاکستان دیاں اہم شاہراہواں (ہائی ویز) تے 40 فاسٹ چارجنگ اسٹیشنز فعال کر ݙتے ویسن۔ صوبیاں کوں ہدایت ݙتی ڳئی اے جو اوہ الیکٹرک ڳاݙیاں دی رجسٹریشن فری کرن تاں جو عوامی قبولیت وچ ودھارا تھیوے۔معاونِ خصوصی نے آکھیا جو نویں پالیسی صنعتی شعبے وچ مقامی مینوفیکچرنگ کوں فروغ ݙیندی پئی ہے۔ ہݨ تئیں 57 مقامی کمپنیاں کوں مینوفیکچرنگ سرٹیفکیٹس جاری کیتے ڳئن، 90 فیصد تئیں مقامی پرزہ جات دی تیاری (لوکلائزیشن) مکمل تھی ڳئی اے، بین الاقوامی کمپنیاں وی پاکستان وچ سرمایہ کاری دی خواہشمند ہن۔ انہاں ݙسایا جو نویں انرجی وہیکل پالیسی پنج کلیدی ستوناں تے مبنی اے: سبسڈی اسکیم، ٹیرف (ٹیکس/ڈیوٹی وچ چھوٹ)، انفراسٹرکچر دی ترقی، معیاری نظام (کوالٹی اتے حفاظت)، ادارہ جاتی فریم ورک اتے پالیسی انٹیگریشن، ماحولیاتی اتے اقتصادی فوائد نال نال ہن۔ ہارون اختر خان آکھیا جو ایں پالیسی نال جِتھاں ماحولیاتی آلودگی وچ ڳھٹکی آسی، اتھاں روزگار دے نویں مواقع، مقامی انڈسٹری دی بحالی، اتے عوامی سہولت کوں فروغ ملسی۔ انہاں آکھیا جو اے صرف ہک ٹرانسپورٹ پالیسی نئیں بلکہ ہک قومی اقتصادی ویژن اے جو پاکستان کوں مستقبل آلے پاسے گھن ویسی۔
