اسلام آباد۔ 22 جون (اے پی پی سرائیکی نیوز) ویمن یونیورسٹی ملتان دی سابق وائس چانسلر پروفیسر ڈاکٹر فرخندہ ضیاء انتقال کرڳئن۔ او کجھ عرصے توں بیمار ہن اَتے انہاں دی آخری تعیناتی ویمن یونیورسٹی ملتان دی وائس چانسلر دے طور تے ہئی۔مرحومہ دا تعلق ایبٹ آباد توں ہئی اَتے او بین الاقوامی اسلامی یونیورسٹی اسلام آباد دی نائب صدر وی رہ چُکیاں ہن۔ انہاں شریعہ اکیڈمی دی ڈی جی اَتے اسلامی نظریاتی کونسل دی رکن دے طور تے وی خدمتاں ݙتیاں۔ڈاکٹر فرخندہ ضیاء بین الاقوامی اسلامی یونیورسٹی اسلام آباد دی فیکلٹی آف شریعہ اینڈ لاء دی سابق پروفیسرہن۔ ایں توں پہلے او ایں یونیورسٹی دی فیکلٹی آف شریعہ اینڈ لاء دی ڈین، شریعہ اکیڈمی دی ڈائریکٹر جنرل، اَتے یونیورسٹی دی وائس پریذیڈنٹ دے طور تے وی کم کر چُکیاں ہن۔ ایں توں انڄ ، او اسلامی نظریاتی کونسل دی رکن وی رہ چُکیاں ہن۔ ڈاکٹر فرخندہ ضیاء اپݨی ایل ایل بی شریعہ اینڈ لاء اَتے ایل ایل ایم دیاں ڈگریاں اسلامی یونیورسٹی اسلام آباد توں ڳھدیاں ۔ بعد اچ انہاں یونیورسٹی آف ہل برطانیہ توں ہک ٻیا ایل ایل ایم اَتے پی ایچ ڈی دی ڈگری ڳھدی۔او پاکستان دی پہلی باضابطہ طور تے مقرر کیتی ڳئی فل ٹائم تریمت پروفیسر آف لاء ہن۔ چائلڈ لیبر اَتے چائلڈ رائٹس دے موضوعات تے انہاں دا تحقیقی کم منئے ونڄݨ آلے ادایں توں شائع تھیا۔انہاں دی نماز جنازہ اڄ رات نماز عشاء دے بعد رات 9:45 تے ایچ 11 قبرستان اچ ادا کیتی ویسی۔(ڈاکٹرسعدیہ کمال)
