ریاض۔ 26 جون (اے پی پی) سعودی عرب اچ نویں ہجری سال دے آغاز تے غلاف کعبہ تبدیل کر ݙتا ڳئے۔ اردو نیوز موجب کسوہ دی تبدیلی دا کم بدھ کوں نماز عصر دے بعد شروع کیتا ڳیا جو خمیس دی سویل مکمل تھیا۔ کسوہ کعبہ مسجد الحرام کانوائے دی صورت اچ منتقل کیتا ویندے۔نواں غلاف کعبہ چار برابر پٹیاں اَتے ستار الباب تے مشتمل اے۔ کسوہ دے ہر ہک حصے کوں انڄ انڄ کعبہ دے اتلے حصے تے گھن آیا ویندے جتھوں ولا انہاں کوں لاتھا ویندے اَتے پچھلا غلاف لہا ڳِھدا ویندے۔ اے عمل چار واری واری دہرایا ویندے جݙاں تئیں نواں غلاف چڑھا نہ ݙتا ون٘ڄے اَتے پراݨا لَہہ نہ ون٘ڄے۔ سب توں پہلے خانہ کعبہ دے دروازے دا پردہ جئیں دی لمبائی 6.35 میٹر اَتے چوڑائی 3.33 میٹر اے کوں لہایا ڳیا۔ کنگ عبدالعزیز کسوہ کمپلیکس اچ غلاف کعبہ کوں تیار کیتا ویندے جئیں دے ست مراحل ہن۔ غلافِ کعبہ دی تیاری اچ تقریباً 11 مہینے لگدن۔ غلاف دی تیاری دا پہلا مرحلہ پاݨی دی فلٹریشن جئیں اچ دھاگیاں کوں دھوتا ویندے۔ خام ریشم کوں اعلیٰ معیار دے کالے رنگ نال رنگا ویندے جئیں دے بعد ایں دا کپڑا تیار تھیندے۔ غلاف دے کپڑے تے آیات دی کڑھائی کیتی ویندی اے جئیں کیتے خالص سونے اَتے چاندی دے دھاگے تیار کیتے ویندن۔ تیار تھیوݨ آلے دھاگیاں کوں متعلقہ معیار دے مطابق پرکھݨ دے بعد انہاں کوں متعلقہ کڑھائی مرکز اچ بھیجیا ویندے۔ خانہ کعبہ دے غلاف کوں مختلف مرحلیاں اچ تیار کرݨ دے بعد اوں کوں مخصوص غلافاں اچ ولھیٹ تے کمپلیکس توں مسجد الحرام اچ منتقل کرݨ کیتے خصوصی انتظامات کیتے ویندن۔ کسوۃ کعبہ خالص ریشم دے 47 حصیاں تے مشتمل اے جئیں تے 24 قیراط سونے دے تاراں نال 68 قرآنی آیات درج ہن۔ کسوہ دا مجموعی وزن 1415 کلو گرام اے۔
