اسلام آباد۔ 27 جون (اے پی پی) وفاقی وزیر خزانہ و محصولات سینیٹر محمد اورنگزیب ریاستی ملکیتی اداریں (ایس او ایز) دی گورننس، آپریشنل کارکردگی اَتے مالی استحکام کوں بہتر بݨاوݨ کیتے حکومت دے عزم دا اعادہ کریندے آکھیے جو کاروباری منصوبیں کوں قومی ترجیحات نال ہم آہنگ کرݨ اَتے عملی چیلنجز کوں وختی اَتے مربوط انداز اچ حل کرݨ دی لوڑھ اے۔ انہاں اے ڳالھ ریاستی ملکیتی اداریں بارے کابینہ دی کمیٹی دے اجلاس دی صدارت کریندے آکھی۔اجلاس اچ وفاقی وزیر توانائی سرداراویس احمد خان لغاری، وفاقی وزیر بحری امور محمد جنید انور چوہدری، وفاقی وزیر سائنس و ٹیکنالوجی خالد حسین مگسی اَتے متعلقہ وزارتاں اَتے ݙویژناں دے اعلیٰ حکام شرکت کیتی۔ وزارت خزانہ دے سینٹرل مانیٹرنگ یونٹ دی طرفوں کمیٹی کوں ریاستی ملکیتی اداریں دی کارکردگی تے مشتمل ششماہی رپورٹ (جولائی 2024 توں دسمبر 2024) تے تفصیلی بریفنگ ݙتی ڳئی۔ رپورٹ اچ اداریں دی مجموعی صورتحال اَتے درپیش وݙے چیلنجز دی نشاندہی کیتی ڳئی، جنہاں اچ 5.8 کھرب روپے دے مجموعی ضیان شامل ہن، جنہاں وچوں چھی مہینے دے دوران 342 ارب روپے دا ضیان وی شامل اے۔اجلاس کوں ݙسیا ڳیا جو تیل، گیس اَتے بجلی دے شعبے اچ گردشی قرضہ 4.9 ٹریلین روپے توں ودھ ڳئے جیڑھا جو کیش فلو اَتے اثاثہ جات دی قدر کوں شدید متاثر کریندا پئے۔ حکومت دی طرفوں ریاستی اداریں کوں گرانٹس، سبسڈیز، قرضیں اَتے ݙوجھی مالی معاونت دی مد اچ چھی مہینے اچ 600 ارب روپے توں ودھ ݙتے ڳئے جیڑھے کُل ریونیو دا تقریباً 10 فیصد اے۔ اجلاس کوں ݙسیا ڳیا جو ڈسکوز اَتے ݙوجھے اداریں اچ غیر فنڈ شدہ پنشن واجبات دا حجم 1.7 ٹریلین روپے تئیں پڄ ڳئے جیڑھا جو مالی گوشواریں اچ ظاہر نئیں کیتے ڳئے جݙاں جو ریلوے دی پنشن واجبات وی ہن۔ اجلاس کوں ݙسیا ڳیا جو حکومت دی طرفوں جاری کیتی ڳئی ضمانتاں دا حجم 2.2 ٹریلین روپے تئیں پڄ ڳئے جݙاں جو قرضیں دی واپسی اَتے مالیاتی تنظیم نو دے خرچے مالی دٻاؤ اچ مزید وادھا کر ݙتے۔گورننس دے مسئلے وی برقرار ہن جنہاں اچ آئی ایف آر ایس سیکشن 30 دے تحت بینفیشل انٹرسٹ دے افشاء اچ شفافیت دی کمی اَتے تعمیل دے ݙوجھے مسئلے شامل ہن، کاروباری منصوبیں اچ تزویراتی ہم آہنگی دی کمی اَتے آپریشنل کمزوریاں وی اصلاحات دیاں متقاضی ہن۔ کمیٹی ریاستی اداریں دے 5.8 ٹریلین روپے دے مجموعی ضیان اَتے صرف گزریل چھی مہینے اچ 342 ارب روپے (یعنی یومیہ 1.9 ارب روپے ضیان) تے تشویش کیتی۔ وزیر خزانہ نشاندہی کیتی جو ڈسکوز دی ناقص کارکردگی، این ٹی ڈی سی دی سست رفتار اپ گریڈیشن، غیر فنڈ شدہ پنشن ذمے واریاں، اَتے کمزور گورننس مالی گنجائش کوں محدود کریندے پئن جیں نال سرمایہ کاراں دا اعتماد متاثر تھیندا پئے ۔ انہاں بجلی اَتے توانائی دے شعبیں اچ وختی اصلاحات دی لوڑھ تے زور ݙتا جِتھاں گردشی قرضہ 4.9 ٹریلین روپے توں ودھ ڳئے۔ وزیر خزانہ حکومت دی طرفوں شفافیت، مالی نظم و ضبط اَتے جوابدہی کوں یقینی بݨاوݨ دے عزم دا اعادہ کیتا۔ وزیر خزانہ آکھیے جو سرکاری ملکیتی اداریں دے بورڈز اچ حکومت دی نمائندگی کرݨ آلے ڈائریکٹرز کوں اپݨیاں ذمے واریاں دا بھرپور احساس ہووݨا چاہیدے اَتے انہاں کوں اداریں دی مالی صحت اَتے کارکردگی دے تحفظ کیتے باخبر اَتے ذمے واری دا کردار ادا کرݨا چاہیدے۔اجلاس اچ پاور ݙویژن دی طرفوں کوئٹہ الیکٹرک سپلائی کمپنی بورڈ دے چیئرمین دی تقرری، انڈیپنڈنٹ سسٹم مارکیٹ آپریٹر دے بورڈ دی تشکیل، گوجرانوالہ الیکٹرک سپلائی کمپنی بورڈ کیتے آزاد ڈائریکٹر/چیئرمین دی تقرری اَتے جنکو ہولڈنگ کمپنی لمیٹڈ دے بورڈ کیتے ڈائریکٹر دی تقرری متعلق سمریاں پیش کیتیاں ڳئیاں اَتے ایں دی منظوری وی ݙے ݙتی ڳئی۔ ملتان الیکٹرک پاور کمپنی، پاور انفارمیشن ٹیکنالوجی کمپنی اَتے انرجی انفراسٹرکچرڈویلپمنٹ اینڈ مینجمنٹ کمپنی دے بورڈز کیتے آزاد ڈائریکٹرز دی نامزدگی اَتے بورڈ دی تشکیل دی سمریاں تے وی غور کیتا ڳئے اَتے ایں دی منظوری ݙتی ڳئی۔ اجلاس اچ وزارت ریلوے دی طرفوں ریلوے کمپنیاں تیل کوپ، پراکس اَتے پی آر ایف ٹی سی کوں ختم کرݨ دی سمری وی زیر غور آئی اَتے ایں دی وی منظوری ݙتی ڳئی۔
