پاکستان پائیدار ترقی دے 2030 ایجنڈے دے حصول کیتے نتیجہ خیز، شفاف اتے جامع شراکت داری کیتے پُرعزم اے، وزیر خزانہ

سیویلا۔ 2 جولائی (اے پی پی) وزیر خزانہ سینیٹر محمد اورنگزیب آکھیا جو پاکستان پائیدار ترقی دے 2030 ایجنڈے دے حصول کیتے نتیجہ خیز، شفاف اتے جامع شراکت داریاں کیتے پُرعزم اے۔ بُدھ کوں وفاقی وزیر خزانہ سینیٹر محمد اورنگزیب سپین دے شہر سیویلا وچ تھیوݨ آلی چوتھی عالمی کانفرنس برائے فنانسنگ فار ݙیولپمنٹ اچ شرکت کیتی اَتے کثیر الفریقی گول میز اجلاس توں خطاب کیتا۔ آپݨے خطاب آچ انہاں عالمی ترقیاتی تعاون کوں مؤثر بݨاوݨ، مالیاتی نظام اچ اصلاحات اَتے پائیدار ترقی دے اہداف (ایس جی ڈیز) دے حصول کیتے فوری عملی اقدامات دی لوڑھ تے زور ݙتے۔وزیر خزانہ آکھیا جو ترقی پذیر ملکاں کوں مالیاتی رسائی وچ سوکھ خاص طور تے بلینڈڈ فنانس دے مواقع ودھاوݨ دی بہوں لوڑھ اے۔ سینیٹر محمد اورنگزیب عالمی برادری تے زور ݙتا جو ہݨ صرف وعدیاں تے اکتفا نئیں کیتا ونڄ سڳدا بلکہ عملدرآمد کیتے فوری ٹھوس اتے مؤثر اقدامات دی لوڑھ اے۔ انہاں ترقیاتی تعاون کوں فروغ ݙیوݨ کیتے ترائے نکاتی حکمت عملی وی پیش کیتی۔انہاں زور ݙتا جو ملکی ترجیحات کوں پہلے رکھݨا پوسی، ترقیاتی منصوبے مقامی ضرورتاں تے ترجیحات دے مطابق ترتیب ݙتے ونجن، سوکھی اتے بلینڈڈ فنانس تئیں رسائی، نرم شرطاں اتے سانجھے مالیاتی ماڈلز کوں فروغ ݙتا ونجے۔ انہاں ٻیا آکھیا جو نتائج تے مبنی شراکت داری اتے ترقیاتی تعاون کوں قابلِ پیمائش اتے نتیجہ خیز بݨایا ونجے۔ وزیر خزانہ عالمی مالیاتی نظام اچ اصلاحات، کریڈٹ ریٹنگ ایجنسیاں دے کردار تے نظرثانی اتے نجی سرمایہ کاری کوں متحرک کرݨ دی لوڑھ تے وی زور ݙتا۔ انہاں آکھیا جو ترقیاتی حکمتاں عملیاں اچ موسمیاتی لچک، صنفی مساوات اَتے ڈیجیٹل شمولیت سویں پہلواں کوں وی مربوط کرݨا ضروری تھی ڳئے۔سینیٹر محمد اورنگزیب تجویز ݙتی جو سیویلا اہداف دے عملی نفاذ کیتے ہک عالمی سطح دا ڈیلیوری میکانزم اَتے ٹاسک فورس ٻݨائی ونجے جو پائیدار ترقی دے اہداف دے حصول اچ رہنمائی، تعاون اتے شفاف نگرانی کوں یقینی بݨا سڳے ۔