جکارتہ۔ 3 جولائی (اے پی پی) انڈونیشیا دے آبنائے بالی اچ مسافر بحری جہاز بݙݨ نال لاپتہ بندیاں دی تعداد 61 تھی ڳئی اے۔ شنہوا موجب ایسٹ جاوا سرچ اینڈ ریسکیو آفس دے ہک سینیئر اہلکار تھولیب واٹیلہان ݙسیا جو انڈونیشیا دے آبنائے بالی اچ خمیس دی سویر ہک مسافر بحری جہاز دے ٻݙݨ نال چار بندیاں دی موت دی تصدیق تھی ڳئی اے جݙاں جو 61 بندے لاپتہ ہن اَتے 23 ٻئے بچ ڳئن۔ اہلکار موجب لکڑی دا بحری جہاز مشرقی جاوا دے بنیوانگی ریجنسی اچ کیتاپانگ بندرگاہ توں بالی جزیرے تے جمبرانا ریجنسی وچ گلیمانوک بندرگاہ ویندا پئے، جݙاں او بݙ ڳیا۔ ایں دے بعد بالی جزیرے اَتے مشرقی جاوا ݙوہیں توں تلاش اتے بچاؤ دیاں کارروائیاں شروع کر ݙتی ڳئن۔
