سیویلا۔ 3 جولائی (اے پی پی) وفاقی وزیر خزانہ سینیٹر محمد اورنگزیب سپین دے شہر سیویل مچ جاری چوتھی بین الاقوامی کانفرنس برائے فنانسنگ فار ڑیولپمنٹ (ایف ایف ڑی فور) دے موقع تے مختلف ملکاں اَتے عالمی اداریاں نال اعلیٰ سطحی ݙو حموج ملاقاتاں کیتی۔ اِنہاں ملاقاتاں دا مقصد ترقیاتی مالیات، تجارت، ماحولیاتی استحکام اَتے ادارہ جاتی اصلاحات سویں شعبیاں اچ پاکستان دی شراکت داریاں کوں ٻیا مضبوط بݨاوݨ ہا۔ وزیر خزانہ نہ صرف کانفرنس دے مرکزی اجلاساں بلکہ مختلف ضمنی نشستاں، پالیسی مکالمیاں اتے شراکتی گول میز مباحثیاں وچ وی پاکستان دی نمائندگی کریندے پئن۔ݙو پاسہ ملاقاتاں بارے وزیر خزانہ محمد اورنگزیب نیدرلینڈز دے وزیر خزانہ ایلکو ہائینن نال تفصیلی ملاقات کیتی جئیں اچ ݙوہیں ملکاں وچال پراݨے اَتے دوستانہ تعلقات کوں ٻیا وݙا کرݨ تے گالھ مہاڑ تھئی۔ ایں وچال تجارت، ترقیاتی تعاون، موسمیاتی لچک اَتے ادارہ جاتی صلاحیت سازی سویں موضوعات تے ڳالھ کیت ڳئی۔ ملاقات اچ پاکستان ولوں زراعت وچ جدید ٹیکنالوجی، آبی وسائل دے انتظام اَتے سرکاری خدمتاں دی ڈیجیٹلائزیشن سویں شعبیاں وچ نیدرلینڈز دی مہارت توں فائدہ چاوݨ دی خواہش دا اظہار کیتا ڳیا۔ وزیر خزانہ دورے اچ عالمی بینک دے سینئر مینجنگ ڈائریکٹر ایکسل وان ٹراٹسنبرگ نال ملاقات کیتی۔ ملاقات دے دوران وزیر خزانہ ے پاکستان دے ترقیاتی ایجنڈے وچ عالمی بینک دی مسلسل حمایت کوں سراہیا اَتے آئی ایم ایف دے ای ایف ایف پروگرام دے کامیاب جائزے اَتے ریزیلیئنس اینڈ سسٹین ایبلیٹی فیسلٹی (آر ایس ایف) دے تحت جاری اصلاحات توں بارے ݙسیا۔ دورے اچ وزیر خزانہ سینیٹر محمد اورنگزیب بین الاقوامی فنڈ برائے زرعی ترقی (آئی ایف اے ڈی) دے صدر الوارو لاریو نال وی ملاقات کیتی جو دیہی ترقی اتے خوراک دے نظام دی اصلاح تے کم کرݨ آلا اقوام متحدہ دا ذیلی ادارہ اے۔ ملاقات اچ پاکستان اتے آئی ایف اے ڈی دے پراݨے تعلقات دا جائزہ ڳِھدا ڳیا جِنھاں دے تحت ہݨ تئیں 29 منصوبے مکمل کیتے ڳئن جِنھاں توں تقریباً 28 لکھ دیہی گھرانے فیدہ چاتے۔ وزیر خزانہ پاکستان وچ آئی ایف اے ڈی دے تعاون نال جاری 6 منصوبیاں دا وی ذکر کیتا اَتے انہاں دی خدمتاں کوں سراہیا۔ ملاقات اچ پالیسی معاونت، پیشہ ورانہ تربیت، کمیونٹی انفراسٹرکچر، مالی رسائی، ماحولیاتی زراعت، ویلیو چین ڈیولپمنٹ اَتے موسمیاتی دھچکیاں دے خلاف مزاحمت سویں منصوبیاں تے گالھ مہاڑ تھئی۔وزیر خزانہ محمد اورنگزیب انٹرنیشنل چیمبر آف کامرس (آئی سی سی) دے سیکریٹری جنرل جان ڈینٹن نال وی ملاقات کیتی۔ ایں موقع تے تجارت اچ سہولت، ایس ایم ای ترقی، سرمایہ کاری دے فروغ اَتے پاکستان دی معیشت دی تبدیلی وچ آئی سی سی دے کردار تے ڳالھ مہاڑ کیتی۔
