راولپنڈی۔ 7 جولائی(اے پی پی)آرمی چیف فیلڈ مارشل سید عاصم منیر، نشان امتیاز (ملٹری) آکھیا جو اساݙی آبادی دے مراکز، فوجی اݙیاں، اقتصادی مراکز اَتے بندرگاہواں کوں نشانہ بݨاوݨ دی کہیں وی کوشش دا شدید، گہرا، تکلیف ݙیوݨ والا اَتے سوچ توں ودھ سخت جواب ݙیتا ویسی۔ جنگاں میڈیا دی بیان بازی، درآمد شدہ فینسی جنگی ساز و سامان یا سیاسی نعراں نال نئیں ٻھل یقین محکم، پیشہ ورانہ قابلیت، آپریشنل شفافیت، اداریاں دی مضبوطی اَتے قومی عزم و حوصلے نال جیتیاں ویندن۔ آئی ایس پی آر توں جاری بیان دے مطابق، آرمی چیف فیلڈ مارشل سید عاصم منیر، نشان امتیاز (ملٹری) نیشنل ݙیفنس یونیورسٹی (این ݙی یو) اسلام آباد دا دورہ کیتا اَتے “نیشنل سکیورٹی اینڈ وار کورس” دے مسلح افواج دے فارغ التحصیل افسران نال خطاب کیتا۔ شرکاء نال خطاب اچ فیلڈ مارشل جنگ دے بدلدے کردار تے الایا۔ فیلڈ مارشل اوکھے حالات اچ پیچیدہ چیلنجز نال مؤثر طور تے نمٹݨ کیتے ذہنی تیاری، عملی سمجھ اَتے ادارہ جاتی پیشہ ورانہ مہارت دی اہمیت تے زور ݙتا۔ آرمی چیف ہائبرڈ، روایتی اَتے غیر روایتی خطرات نال مؤثر انداز اچ نمٹݨ دی صلاحیت رکھݨ والی مستقبل دی قیادت دی تیاری اچ نیشنل ݙیفنس یونیورسٹی جھیں اہم اداریاں دے کردار کوں سراہا۔ آرمی چیف سول اَتے ملٹری اداریاں وچال ہم آہنگی ودھاوݨ دی لوڑھ تے وی زور ݙتا۔ فیلڈ مارشل سید عاصم منیر آکھیا جو بھارت آپریشن سندور دے دوران اپݨے مقرر کیتے ڳئے فوجی اہداف حاصل کرݨ اچ ناکام رہے۔ بھارت دی ولوں آپریشن سندور اچ ناکامی دی غیر منطقی توجیہات پیش کرݨ دراصل بھارت دی آپریشنل تیاری اَتے سٹریٹجک دور اندیشی دی کمی کوں ثابت کریندے۔ آپریشن بنیان مرصوص اچ پاکستان دی کامیابی وچ بھارت ولوں بیرونی حمایت جھیں الزام غیر ذمہ دارانہ اَتے حقائق دے منافی ہن، ایں قسم دے بیانات بھارت دی آپریشن بنیان مرصوص اچ پاکستان دی کامیابی کوں منݨ اچ روایتی ہچکچاہٹ دی عکاسی کریندن اَتے پاکستان دی ݙہاکیاں تے مبنی حکمت عملی، مقامی صلاحیت اَتے مضبوط اداریاں دی بنیاد تے کامیابی کوں تسلیم کرݨ توں گریزاں ہین۔ انہاں آکھیا جو خالصتاً ݙو طرفہ فوجی تصادم اچ ݙوجھے ملکاں کوں شامل کرݨ، بھارت دی ناقص سیاسی کوشش اے، بھارت ولوں اینڄھے بے بنیاد بیاناں دا مقصد خطے اچ فرضی “نیٹ سکیورٹی پروائیڈر” دے خود ساختہ رول دی ناکام کوشش اے، او وی اینڄھے ویلے جݙاں خطے دے ملکاں بھارت دی جارحانہ اَتے ہندوتوا نظریے توں تنگ ہن۔ بھارت دے خودغرضانہ اَتے تنگ نظر رویے دے برعکس، پاکستان اقوام عالم اچ اصولی سفارت کاری تے مبنی دیرپا شراکت داری، باہمی احترام اَتے امن دی بنیاد تے تعلقات ٻݨائن اَتے آپ کوں خطے اچ نیٹ ریجنل سٹیبلائزر ثابت کیتے۔ آرمی چیف پاکستان دے اصولی موقف کوں دوہریندے آکھیا جو کہیں وی مہم جوئی، پاکستان دی خودمختاری اَتے سالمیت کوں نقصان پچاوݨ دی کوشش یا اوںدی خلاف ورزی دا بغیر کہیں ہچکچاہٹ دے فوری اَتے مُنہ توڑ جواب ݙیتا ویسی۔ ایںدے نال پیدا تھیوݨ والی کشیدگی دی اصل ذمہ واری اوں (بھارت) بصیرت توں محروم مغرور جارح تے ہوسی جیہڑی ہک خودمختار ایٹمی ریاست دے خلاف اشتعال انگیزی توں پیدا تھیوݨ والے ممکنہ تباہ کن نتائج دا ادراک کرݨ اچ ناکام رہے۔ انہاں آکھیا جو جنگاں میڈیا دی بیان بازی، درآمد شدہ فینسی جنگی ساز و سامان یا سیاسی نعراں نال نئیں جیتیاں وینداں، جنگاں یقین محکم، پیشہ ورانہ قابلیت، آپریشنل شفافیت، اداریاں دی مضبوطی اَتے قومی عزم و حوصلے نال جیتندن۔ فیلڈ مارشل پاکستان دی مسلح افواج دی پیشہ ورانہ مہارت، جذبے اَتے جنگی تیاری تے مکمل اعتماد کریندے فارغ التحصیل افسران تے زور ݙیتا جو او دیانتداری، بے لوث خدمت اَتے قوم کیتے غیر متزلزل عزم تے ثابت قدم رہون۔ این ݙی یو آمد تے صدر این ݙی یو آرمی چیف دا پرتپاک استقبال کیتا۔
