لاہور۔ 14 جولائی (اے پی پی) پی ڈی ایم اے پنجاب دریائے سندھ اچ تونسہ بیراج تے فلڈ بارے الرٹ جاری کر ݙتے۔ ترجمان پی ڈی ایم اے موجب تونسہ بیراج اچ درمیانے درجے دی سیلابی صورتحال اے اَتے پاݨی دی سطح مسلسل ودھدی پئی اے، تونسہ بیراج تے پاݨی دا بہاؤ 4 لکھ 18 ہزار کیوسک اے جݙاں جو گڈو اَتے سکھر بیراج تے نِیویں درجے دی سیلابی صورتحال اے۔ ڈیرہ غازی خان تے بہاولپور دے کمشنرز اَتے کوٹ ادو، مظفرگڑھ، ڈیرہ غازی خان، راجن پور اَتے رحیم یار خان دے ڈپٹی کمشنرز، ریسکیو 1122، لوکل گورنمنٹ، محکمہ زراعت، محکمہ آبپاشی، محکمہ صحت، محکمہ جنگلات، لائیو سٹاک اَتے محکمہ ٹرانسپورٹ کوں وی الرٹ جاری کر ݙتا ڳئے۔ڈی جی پی ڈی ایم اے عرفان کاٹھیا دا ایں بارے آکھݨ اے جو متعلقہ انتظامیہ الرٹ رہوے، وزیراعلیٰ دی ہدایت تے سارے انتظامات پہلے توں مکمل کرن، ایمرجنسی کنٹرول رومز وچ سٹاف اَتے ریسکیو 1122 دی ڈیزاسٹر رسپانس ٹیماں کوں وی ہائی الرٹ رکھیا ونڄے۔ انہاں آکھیا جو ریسکیو آپریشن کیتے پٹرول تے ڈیزل دا سٹاک کافی مقدار اچ ہووݨا چاہیدے، عوام کوں وی صورتحال توں ہر لمحے آگاہ رکھیا ونڄے۔ انہاں دا آکھݨا ہا جو دریاواں دے پاٹ اچ موجود مکاناں اَتے مویشیاں دے انخلا کوں یقینی بݨاون، ایں علاوہ فلڈ ریلیف کیمپس وچ خوراک، پیوݨ دےلے پاݨی تے ٻئی سہولتاں دی فراہمی یقینی بݨائی ونڄے
