بغداد۔17جولائی (اے پی پی) عراق دے مشرقی شہر الکوت اچ شاپنگ مال اچ ٻھاہ لگݨ نال تقریباً 50 بندے جاں بحق جݙاں جو درجناں زخمی تھی ڳئے۔ اے ایف پی دے مطابق صوبہ واسط دے گورنر محمد المیاہی آکھیا جو گزریل ݙینھ الکوت اچ ہک وݙے شاپنگ سینٹر “ہائپر مال” اچ ٻھاہ لڳݨ پاروں تقریباً 50 بندے جاں بحق اتے زخمی تھئن۔ واقعہ دی اطلاع مِلݨ تے ایمبولینسز موقع تے پُج ڳئیاں اتے زخمیاں کوں الکوت دے ہسپتال منتقل کیتا ڳیا۔ ٻھاہ لگݨ دی وجہ حالے تئیں معلوم نئیں تھی سڳی۔ گورنر محمد المیاہی صوبے اچ 3 ݙینھ دے سوگ دا اعلان کریندیں ہوئیں آکھیا جو مقامی حکام عمارت اتے مال دے مالک دے خلاف مقدمہ دائر کریسن۔ اے ایف پی دے ہک نمائندے ݙسیا جو مال صرف پنج ݙینھ پہلے کھُلیا ہا۔ ابتدائی اطلاعات دے مطابق ٻھاہ پہلی منزل توں شروع تھئی ہئی۔
