پنجاب اچ بارشاں اتے گلیشیئر پگھلݨ پاروں دریاواں اچ پاݨی دا بہاؤ ودھ ڳئے

لاہور۔18 جولائی (اے پی پی) پنجاب اچ مون سون دی بارشاں اتے گلیشیئر پگھلݨ پاروں دریاواں اچ پاݨی دے بہاؤ ودھدا ویندے۔  ڈی جی پی ڈی ایم اے عرفان علی کاٹھیا موجب دریائے سندھ اچ تربیلا اتے چشمہ دے ڄاہ تے نچلے درجے دا سیلاب جݙاں جو کالا باغ دے مقام تے درمیانے درجے دا سیلاب ریکارڈ کیتا ڳئے۔ جڈانجو دریائے راوی، چناب، جہلم اتے ستلج اچ پاݨی دا بہاؤ معمول دی سطح تے اے، جݙاں جو ڈیرہ غازی خان دی رودکوہیاں اچ وی پاݨی دی صورتحال معمول دے مطابق اے۔ ڈی جی پی ڈی ایم اے عرفان علی کاٹھیا متعلقہ ضلعیاں دی انتظامیہ کوں الرٹ رہݨ دی ہدایت کریندیں ہوئیں آکھیا جو ممکنہ سیلابی خطرے پاروں خطرے آلے ضلعیاں اچ سارے انتظامات مکمل کر ڳھدے ڳئن۔ انہاں دا آکھݨ ہا جو منگلا ڈیم اچ پاݨی دی سطح 47 فیصد جݙاں جو تربیلا ڈیم اچ 79 فیصد تئیں پُج ڳئی اہے۔ ستلج، بیاس اتے راوی تے قائم بھارتی ڈیمز اچ پاݨی دی سطح 36 فیصد تئیں اے۔ پی ڈی ایم اے کنٹرول روم اتے ضلعی ایمرجنسی آپریشن سنٹرز 24/7 صورتحال کوں مانیٹر کریندے پئن۔ ڈی جی پی ڈی ایم اے عوام توں اپیل کیتی اے جو برسات دے موسم اچ احتیاطی تدابیر اختیار کرن، خراب موسم اچ غیر ضروری سفر توں پرہیز کرن اتے بجلی دی تاراں یا کھمبیاں کوں ہرگز نہ پکڑݨ۔ ہنگامی صورتحال اچ پی ڈی ایم اے ہیلپ لائن 1129 تے رابطہ کرن۔