مسجد نبوی اچ 25 ہزار قالین، ہر ہک اچ الیکٹرانک چپ لاتی ڳئی اے

ریاض ۔23 جولائی (اے پی پی) مسجد نبوی اچ 25 ہزار قالین وچھا ݙتے ڳئن۔ اردو نیوز موجب مسجد الحرام اتے مسجد نبوی دی ݙیکھ بھال دے امور دی جنرل اتھارٹی آکھیے جو مسجد اچ 25 ہزار توں ودھ قالین وچھائے ڳئن، انہاں اچوں 14 ہزار توں ودھ صحناں اچ، 6 ہزار 150 راہداریاں اچ اتے 5 ہزار 500 قالین مسجد دی چھت تے وچھائے ڳئن۔ مسجد نبوی اچ وچھائے ڳئے ہر قالین اچ ہک آر ایف آئی ڈی الیکٹرانک چپ لڳی اے جو ایں دے ڈیٹا، لوکیشن، ایں دے بݨݨ دی تاریخ، واشنگ شیڈول، مسجد اتے باہری حصیاں اچ قالیناں دی موومنٹ کوں ٹریک کرݨ اچ مدد کریندی اے۔ ایں نال آپریشنل کارکردگی کوں ودھاوݨ اتے خدمتاں دے معیار کوں بہتر بݨاوݨ اچ مدد ملی اے۔ مسجد نبوی اچ استعمال تھیوݨ آلے قالیناں دی موٹائی 16 ملی میٹر اے۔ انہاں کوں اعلیٰ معیار دی ہنرمندی اتے رنگ دی پائیداری نال پچھاݨا ویندے۔ مسجد نبوی اچ ݙینھ اچ 3 واری قالیناں دی صفائی کیتی ویندی اے جݙاں جو 1600 لیٹر جراثیم کش مواد دا سپرے کیتا ویندے۔ قالیناں کوں معطر کرݨ کیتے 200 لیٹر خوشبودار مواد دا استعمال کیتا ویندے، 150 قالین ݙینھ وار بنیاد تے ݙھوئے وی ویندن۔ اے سارے اقدامات مسجد نبوی اچ زائراں اتے نمازیاں کوں ہک محفوظ اتے روحانی ماحول ݙیوݨ کیتے اتھارٹی دے عزم کوں نشابر کریندن۔