غزہ اچ قحط انسانیت کیتے شرم دی ڳالھ اے، سپین، جرمن چانسلر دا امداد دی فراہمی کیتے فضائی پُل ٻݨاوݨ دا اعلان

برلن۔29 جولائی (اے پی پی) جرمن چانسلر فریڈرک میرٹس اردن دے نال رَل تے غزہ کوں امداد ݙیوݨ کیتے “انسانی ہمدردی دا فضائی پُل” ٻݨاوݨ دا اعلان کیتے۔ العربیہ اردو موجب انہاں جرمنی دے دارالحکومت برلن اچ پریس کانفرنس اچ آکھیا جو انہاں دا ملک اردن دے نال رَل تے غزہ کیتے “انسانی ہمدردی دا فضائی پُل” ٻݨیسی جئیں دا مقصد فلسطینیاں دی مدد کرݨ اے جو اقوام متحدہ دے مطابق غذائی قلت دی “تشویشناک سطح” دا سامݨا کریندے پئن۔ انہاں آکھیا جو وزیر دفاع بورس پیسٹوریئس فرانس اتے برطانیہ دے نال نیڑے ہم آہنگی اچ کم کریسن جو غذائی مواد اتے طبی سامان پڄاوݨ کیتے ہک ایہو جہا “فضائی پُل” ٻݨاوݨ کیتے وی تیار ہن۔ایں توں پہلے سپین اعلان کیتا ہا جو او ایں ہفتے غزہ اچ 12 ٹن غذائی امداد فضائی رستے توں سٹݨ دا ارادہ رکھیندے ۔ اسرائیل ولوں جاری 21 مہینے دی جنگ دے بعد محصور اتے تباہ شدہ غزہ اچ قحط دا خطرہ ودھدا پئے۔ سپین دے وزیر اعظم پیڈرو سانچیز ہک پریس کانفرنس اچ وضاحت کیتی جو غزہ اچ امداد سٹݨ دی کارروائیاں جمعہ کوں اردن توں ہسپانوی فضائیہ دے طیاریاں دے ذریعے کیتی ویسن۔ انہاں آکھیا جو غزہ اچ قحط پوری انسانیت کیتے شرم دی ڳالھ اے اتے ایں کوں روکݨ ایں کیتے ہک اخلاقی فریضہ اے۔ وزارت دفاع وضاحت کیتی جو اے امداد مارچ 2024 اچ ایہو جہے آپریشن اچ تقسیم کیتی ویسی جݙاں سپین غزہ کوں 26 ٹن غذائی مواد فراہم کیتا ہا۔ غزہ دی وزارت صحت دے اعداد و شمار موجب غزہ اچ بکھ اتے غذائی قلت پاروں شہید تھیوݨ آلے فلسطینیاں دی تعداد ودھ تے 147 تھی ڳئی اے جنہاں اچ 88 ٻال وی شامل ہن۔