کشمیری اڄ یوم استحصال کشمیر کوں یوم سیاہ دے طور تے منیندے پئن، حریت چیئرمین دی مقبوضہ جموں تے کشمیر اچ ہڑتال اتے احتجاج دی اپیل

سرینگر۔5اگست (اے پی پی) کنٹرول لائن دے ݙوہائیں پاسے، پاکستان اتے پوری دنیا اچ رہݨ آلے کشمیری اڄ یوم استحصال کشمیر کوں یوم سیاہ دے طور تے منیندے پئن تاں جو بھارت دے 5اگست 2019 دے غیر قانونی اتے ہک پاسے دے اقدامات دے خلاف احتجاج ریکارڈ کرایا ونڄ سڳے۔ کشمیر میڈیا سروس موجب یوم سیاہ مناوݨ دی اپیل کل جماعتی حریت کانفرنس اتے ݙوجھیاں آزادی پسند تنظیماں کیتی اے۔ کل جماعتی حریت کانفرنس دے نظربند چیئرمین مسرت عالم بٹ نویں دہلی دی تہاڑ جیل توں جاری ہک سنیھے اچ لوکاں توں اپیل کیتی جو او اڄ مقبوضہ علاقے اچ پوری ہڑتال، سول کرفیو اتے احتجاجی ریلیاں دا اہتمام کرن۔ انہاں آکھیا جو 5 اگست دے مودی حکومت دے ہک پاسے دے اقدامات دا مقصد جموں تے کشمیر کوں زور نال رلاوݨ اتے ایں دے مسلمان اکثریت دی شناخت کوں مکاوݨ ہئی۔ جیل اچ نظربند حریت رہنما بلال صدیقی آکھیا جو اقوام متحدہ دی قرارداداں تے عملدرآمد ای تنازعہ کشمیر دا ہک پرامن حل اے۔ وادی کشمیر اتے جموں خطے دے مختلف علاقیاں اچ جیلاں اچ نظربند ممتاز حریت رہنماواں دی تصویراں آلے پوسٹر لاتے ڳئن جنہاں اچ آکھیا ڳئے جو “کشمیری بھارتی قبضے کوں منّݨ توں انکار کریندن۔ پوسٹراں آچ اقوام متحدہ، او آئی سی اتے یورپی یونین توں مطالبہ کیتا ڳئے جو او زمینی حقائق دا جائزہ گھنݨ کیتے آپݨی ٹیماں مقبوضہ علاقے اچ بھیجن۔