اڄوکے سال جولائی اچ ترسیلات زر دی مجموعی مالیت 3.2 ارب ڈالر رہی جیڑھی ملکی معیشت کیتے مثبت اشارہ اے، سٹیٹ بینک

اسلام آباد۔8اگست (اے پی پی)اڄوکے سال جولائی اچ ٻاہرلے ملک رہݨ آلے پاکستانیاں ولوں وطن کوں بھیجی ڳئی ترسیلات زر دی مجموعی مالیت 3.2 ارب ڈالر رہی جیڑھی ملکی معیشت کیتے ہک مثبت اشارہ اے۔ سٹیٹ بینک آف پاکستان موجب گزریل سال دے ہکے ہی دور دے مقابلے اچ ترسیلات زر اچ 7.4 فیصد دا قابل ذکر ودھارا ریکارڈ کیتا ڳئے جیڑھا جو ٻاہرلے ملک رہݨ آلے پاکستانیاں دی وطن نال وابستگی اتے مالی تعاون دا مظہر اے۔ ترسیلات زر اچ سعودی عرب توں 823.7 ملین ڈالر، متحدہ عرب امارات توں 665.2 ملین ڈالر، برطانیہ توں 450.4 ملین ڈالر اتے امریکا توں 269.6 ملین ڈالر ہن۔ سٹیٹ بینک آف پاکستان ترسیلات زر اچ ایں مسلسل ودھارے کوں مزدوراں دے اعتماد اتے حکومتی پالیسیاں دے فیدیں دا نتیجہ قرار ݙیندے جیڑھا قانونی ذریعے نال ترسیلات دی حوصلہ افزائی اتے سہولت ݙیوݨ کیتے کوشاں ہن۔