پنجاب دے دریاواں اچ طغیانی دا خدشہ، بھارت ولوں آوݨ آلے 2 ݙینہاں اچ دریائے ستلج اچ پاݨی چھوڑݨ دا امکان، پی ڈی ایم اے

لاہور۔12اگست (اے پی پی) اُتلے علاقیاں اچ مینھ پاروں پنجاب دے دریاواں اچ طغیانی دا خدشہ اے۔ ترجمان پی ڈی ایم اے دے مطابق بھارت ولوں آوݨ آلے 2 ݙینہاں اچ دریائے ستلج اچ پاݨی چھوڑݨ دا امکان اے۔ بھارتی ڈیمز اچ پاݨی دی سطح اچ غیر معمولی ودھارا ریکارڈ کیتا ڳئے۔ بھاکڑا ڈیم 61، پونگ ڈیم 76 اتے تھین ڈیم 64 فیصد تئیں بھر ڳئن۔ ترجمان دے مطابق پی ڈی ایم اے، ارسا اتے محکمہ آبپاشی 24 گھنٹے دریاواں اتے ڈیمز دی صورتحال کوں مانیٹر کریندے پئن۔ دریائے ستلج اچ گنڈا سنگھ دے مقام تے سیلاب نِکّے درجے توں معمول تے آ ڳئے جݙاں جو دریائے ستلج دے بہاؤ اچ ٻیا ودھارے دا خدشہ اے۔ ایں طرح دریائے چناب اچ مرالہ، خانکی اتے قادر آباد دے مقام تے درمیانے توں اُچے درجے دے سیلاب دی وارننگ جاری کر ݙتی ڳئی اے۔ ڈی جی پی ڈی ایم اے عرفان کاٹھیا کمشنراں، ڈپٹی کمشنراں اتے متعلقہ محکمہ کوں الرٹ رہݨ دی ہدایت کر ݙتن۔ انہاں آکھیا جو دریاواں دے پاٹ اچ موجود شہری فوراً محفوظ علاقیاں اچ منتقل تھی ونڄن۔ ہنگامی انخلا دی صورت اچ انتظامیہ نال تعاون کرو۔ احتیاطی تدابیراں اختیار کرو۔ دریاواں، نہراں، ندی نالیاں اتے تالاباں اچ ہرگز نہ دھاؤ۔ سیلابی صورتحال اچ دریاواں دے پاسے پکنک اتے غیر ضروری کراسنگ توں بچو۔ بالاں کوں دریاواں اتے ندی نالیاں دے نیڑے ہرگز نہ ونڄݨ ݙیو۔ ڈی جی پی ڈی ایم اے ٻیا آکھیا جو ایمرجنسی دی صورتحال اچ پی ڈی ایم اے پنجاب دی ہیلپ لائن 1129 تے رابطہ کرو۔ شہریاں دی جان تے مال دی حفاظت پی ڈی ایم اے پنجاب دی ذمے واری اے۔