گلگت بلتستان اچ مینھ اتے سیلاب، جانی تے مالی ضیان

گلگت۔15اگست (اے پی پی) گلگت بلتستان اچ گزریل ݙینھ توں جاری مینھ اتے سیلابی ریلیاں تباہی مچا ݙتی، مختلف حادثیاں اچ تریمت سودھے کئی لوک جاں بحق اتے کئی لاپتہ تھی ڳئے۔ صوبائی حکومت دے ترجمان فیض اللہ فراق موجب غذر دے علاقے خلتی اچ ہک تریمت سودھے 3 افراد جاں بحق جݙاں جو ادھ درجن توں ودھ گھر ملبے دے تلے دب ڳئے۔ تریڄھے لوکاں دی تلاش کیتے سرچ آپریشن جاری اے۔ دیامر دے علاقے بونر اچ سیلابی ریلی ہک بھیݨ اتے بھرا کوں رول ڳئی جنہاں دی تلاش جاری اے۔ شاہراہ بابوسر تے لینڈ سلائیڈنگ نال ہک بال زخمی تھیا جݙاں جو غذر، خلتی، یاسین اتے تھوئی اچ مکانات، فصلاں، سکول، واٹر ٹینک اتے زرعی زمین تباہ تھی ڳئی۔ شاہراہ بلتستان اتے سدپارہ اچ لینڈ سلائیڈنگ پاروں آ ونڄ متاثر تھئی۔ دیامر تھور اچ وی سیلابی پاݨی وݙے پیمانے تے ضیان کیتے۔ حکومت گلگت بلتستان متاثرہ علاقیاں اچ ایمرجنسی نافذ کریندیں ہوئیں ڈیزاسٹر مینجمنٹ اتھارٹی اتے ریسکیو 1122 کوں الرٹ رہݨ دی ہدایت کیتی اے۔ ترجمان موجب دریائے گلگت اچ پاݨی دے بہاؤ اچ تیکھیائی پاروں نیویں علاقیاں کوں خالی کرݨ دی ہدایت جاری کر ݙتی ڳئی اے۔ فیملی پارک گلگت اتے چنار باغ گلگت دے آسے پاسے ڈر دی فضاء قائم اے اتے شہریاں کوں محتاط رہݨ دا آکھیا ڳئے۔ فیض اللہ فراق آکھیا جو گلگت بلتستان اوکھی آزمائش توں لنگھدا پئے جڈانجو صوبائی حکومت سارے وسائل کوں استعمال اچ گھن آ تے ریسکیو اتے سرچ آپریشن کریندی پئی اے۔