سیاسی، اقتصادی اتے ثقافتی شعبیاں اچ ݙوپاسہ تعاون کوں ٻیا مضبوط بݨاوݨ دی لوڑھ اے، وزیراعظم شہباز شریف دی بنگلہ دیش دے ہائی کمشنر نال ملاقات اچ گالھ مہاڑ

اسلام آباد۔15اگست (اے پی پی) وزیراعظم محمد شہباز شریف پاکستان اتے بنگلہ دیش وچال مختلف شعبیاں اچ ودھدے ہوئے تعلقات تے اطمینان کریندیں ہوئیں آکھیا جو “سیاسی، اقتصادی اتے ثقافتی شعبیاں اچ ݙوپاسہ تعاون کوں ٻیا مضبوط بݨاوݨ دی لوڑھ اے۔ وزیراعظم آفس دے میڈیا ونگ ولوں جاری بیان موجب وزیراعظم محمد شہباز شریف نال عوامی جمہوریہ بنگلہ دیش دے ہائی کمشنر محمد اقبال حسین خان خمیس کوں وزیراعظم ہاؤس اچ ملاقات کیتی۔ ملاقات اچ وزیراعظم بنگلہ دیش دے چیف ایڈوائزر ڈاکٹر محمد یونس دے نال دسمبر اچ قاہرہ اچ ڈی ایٹ سربراہی اجلاس دے موقع تے آپݨی گرمجوشی آلی ملاقات اتے نتیجہ خیز گالھ مہاڑ دا ذکر کریندیں ہوئیں فریقین وچال میکانزم دے ول شروع تھیوݨ تے اطمینان کیتا۔ انہاں ݙوپاسہ تعلقات کوں اڳوں ودھاوݨ کیتے ایں رفتار کوں برقرار رکھݨ دی اہمیت تے زور ݙیندیں ہوئیں آکھیا جو سیاسی، اقتصادی اتے ثقافتی شعبیاں اچ ݙوپاسہ تعاون کوں ٻیا مضبوط بݨاوݨ دی لوڑھ اے۔ وزیراعظم آکھیا جو پاکستان بنگلہ دیش دے نال تجارت اتے عوام وچال رابطیاں کوں ودھاوݨ چاہندے۔ ݙوہیں ملکاں دی قیادت ولوں ݙوپاسہ تعلقات کوں مضبوط بݨاوݨ دی خواہش دا اظہار کریندیں ہوئیں بنگلہ دیش دے ہائی کمشنر اقبال حسین وزیراعظم کوں سفر، تجارت اتے رابطیاں کوں سوکھا بݨاوݨ کیتے ݙوہیں ملکاں ولوں چاتے ونڄݨ آلے مختلف اقدامات دا ݙسیا۔ انہاں پاکستان اتے بنگلہ دیش وچال دوستی دے تاریخی بندھن کوں ٻیا مضبوط بݨاوݨ کیتے اقدامات جاری رکھݨ دی خواہش دا وی اظہار کیتا۔ وزیراعظم ہائی کمشنر کیتے نیک خواہشات دا اظہار کریندیں ہوئیں انہاں کوں مکمل تعاون دا یقین ݙیوایا اتے ایں یقین دا اظہار کیتا جو انہاں دے دور اچ پاکستان اتے بنگلہ دیش دے تعلقات اچ مثبت پیش رفت تھیندی راہسی۔