نائب وزیرِاعظم / وزیرِ خارجہ سینیٹر محمد اسحاق ڈار دورہ برطانیہ منسوخ کر ݙتا

اسلام آباد۔16اگست (اے پی پی) نائب وزیرِاعظم / وزیرِ خارجہ سینیٹر محمد اسحاق ڈار آکھیے جو خیبرپختونخوا اتے پاکستان دے شمالی علاقیں اچ اڄوکے طوفانی مینھ اتے اچاچیت آوݨ آلی چھل دے نتیجے اچ قیمتی جاناں دے ضیان اتے تباہی تے ٻہوں ݙکھ اے اتھاں قومی امدادی سرگرمیاں اتے انہاں نال یکجہتی کیتے آپݨا دورہ برطانیہ منسوخ کرینداں۔ دفتر خارجہ توں جاری بیان موجب انہاں آکھیا جو ساݙے دل انہاں خانداناں دے نال ہن، جنہاں آپݨے پیاریں کوں ونڄا ݙتا، جیڑھے زخمی تھئے، یا جنہاں دے گھر اتے روزگار تباہ تھئن۔ اسحاق ڈار آکھیا جو حکومتِ پاکستان سارے موجود وسائل کوں متحرک کریندی پئی اے تاں جو متاثرہ لوکاں کوں امداد ݙتی ونڄ سڳے اتے ریسکیو آپریشنز کیتے ونڄ سڳن۔ انہاں آکھیا جو وفاقی اتے صوبائی ادارے، مسلح افواج اتے مقامی انتظامیہ متاثرہ علاقیں تئیں رسائی حاصل کرݨ اتے شہریاں دی حفاظت کوں یقینی بݨاوݨ کیتے محنت کریندے پئن۔ وزیرِاعظم شہباز شریف ہک ہنگامی اجلاس دی صدارت کیتی اے اتے حکومت نیڑے ہم آہنگی دے نال وختی ضرورتاں کوں پورا کرݨ اتے متاثرہ علاقیں دی لمبے عرصے دی بحالی کیتے منصوبہ بندی کریندی پئی اے۔ انہاں آکھیا جو برطانیہ اچ میݙے نائب وزیرِاعظم انجیلا رینر، دولتِ مشترکہ دی سیکریٹری جنرل شرلی آیورکور بوچوے، برطانوی وزیرِ مملکت خارجہ ہیمش فالکنر اتے ہاؤس آف کامنز و ہاؤس آف لارڈز دے ارکان دے نال پہلے توں طے شدہ سرکاری شیڈول دے علاوہ میں برٹش پاکستانی کمیونٹی نال مجوزہ ملاقات منسوخ کریندا پیاں۔ اے فیصلہ انہاں متاثرہ خانداناں دے نال اظہارِ یکجہتی، تعزیت اتے قومی سطح تے جاری امدادی اتے بحالی سرگرمیاں تے توجہ مرکوز رکھݨ کیتے کیتا ڳئے۔ انہاں آکھیا جو کمیونٹی ایونٹ دے سارے منتظمین توں دلوں معذرت کرینداں ۔اسحاق ڈار آکھیا جو میں سارے پاکستانیاں توں، بھاویں او ملک اچ ہوون یا ٻاہرلے ملک انہاں توں اپیل کرینداں جو او متاثرہ خانداناں کوں آپݨیاں دعاواں اچ یاد رکھن اتے جیں حد تئیں ممکن تھیوے امدادی سرگرمیاں اچ آپݨا کردار ادا کرن۔