وفاقی وزیر داخلہ محسن نقوی دا اوچ شریف اچ شہید کیپٹن محمد آصف دی رہائش گاہ دا دورہ

اسلام آباد۔16اگست (اے پی پی) وفاقی وزیر داخلہ محسن نقوی بہاولپور دے نیڑے اوچ شریف اچ شہید کیپٹن محمد آصف دی رہائش گاہ دا دورہ کیتا، وزیر داخلہ شہید کیپٹن محمد آصف دے والدین، بھراواں اتے ݙوجھے گھر آلیں نال ملاقات کیتی، دلوں ہمدردی و تعزیت دا اظہار کیتا اتے فاتحہ خوانی وی کیتی۔ وزارت داخلہ موجب وزیر داخلہ شہید کیپٹن محمد آصف دے ݙکھی خاندان کیتے صبر جمیل دی دعا کیتی اتے شہید کیپٹن آصف دے والد، والدہ اتے بھراواں دے عزم اتے حوصلے دی تعریف کیتی۔ انہاں شہید کیپٹن دی والدہ کوں دلاسہ ݙتا اتے انہاں دی ہمت کوں سلام پیش کیتا۔ وزیر داخلہ محسن شہید کیپٹن محمد آصف دے 10 مہینے دے پتر محمد ارسلان نال شفقت دا اظہار کریندیں ایں کوں جھولی اچ ٻلھا تے پیار کیتا۔ ایں موقع تے وزیر داخلہ شہید کیپٹن کوں گھٹ عمری اچ ملݨ آلے میڈلز اتے ایوارڈز وی ݙٹھے۔ انہاں شہید دے گھر آلیاں نال ڳالھ کریندیں آکھیا جو تہاݙے جیھے ہمت آلے خاندان دا حوصلہ ہی قوم دی اصل قوت اے، شہید کیپٹن محمد آصف بہادری دی انوکھی مثال اے۔ محسن نقوی آکھیا جو شہید کیپٹن محمد آصف دے والدین کوں سلام پیش کرینداں۔ انہاں آکھیا جو شہید فتنہ الہندوستان دے دہشت گرداں دے خلاف بہادری نال لڑدیں شہادت دا رتبہ حاصل کیتا، نوجوان پتر زخمی تھیوݨ دے باوجود بہادری اتے دلیری نال بھارتی سرپرست دہشت گرداں کوں جہنم واصل کیتا۔ محسن نقوی آکھیا جو ساݙا ایمان اے جو شہید ہمیشہ زندہ رہندن اتے کیپٹن محمد آصف وی ہمیشہ ساݙے دلاں اچ زندہ رہسن، پوری قوم شہیداں دے خانداناں دی عظمت کوں سلیوٹ پیش کریندی اے۔ وزیر داخلہ آکھیا جو اساں شہید کیپٹن محمد آصف دے خاندان دے نال کھڑوں اتے ہمیشہ نال کھڑے رہسوں، شہیداں دے خانداناں دا خیال رکھݨا ساݙی قومی ذمہ واری اے، شہیداں دے خانداناں دیاں انوکھی قربانیاں بھلݨ جوڳیاں کائنی واضح رہے جو کیپٹن محمد آصف 12 اگست کوں بلوچستان دے بسیمہ شہر اچ بھارتی سرپرست دہشت گرداں دے خلاف بہادری نال لڑدیں ہوئیں شہید تھی ڳئے ہن۔