خیبر پختونخوا دی صوبائی حکومت اتے پی ڈی ایم اے کوں مکمل معاونت ݙتی ویندی پئی اے، این ڈی ایم اے

اسلام آباد۔16اگست (اے پی پی) نیشنل ڈیزاسٹر مینجمنٹ اتھارٹی (این ڈی ایم اے) آکھیے جو وزیراعظم دی ہدایت موجب این ڈی ایم اے خیبر پختونخوا دی صوبائی حکومت اتے پی ڈی ایم اے کوں مکمل معاونت کریندا پئے۔ میڈیا ونگ این ڈی ایم اے موجب این ڈی ایم اے دی ٹیم امدادی کماں اچ معاونت اتے نگرانی کیتے پشاور اچ موجود اے، این ڈی ایم اے، مسلح افواج اتے فلاحی اداریں ولوں خیبر پختونخوا کیتے امدادی سامان روانہ کر ݙتا ڳئے۔ امدادی سامان اچ ایمبولینس، جنریٹر، کمبل، خیمے، ڈی واٹرنگ پمپس، راشن اتے سُکا کھیر شامل اے۔ این ڈی ایم اے سارے متعلقہ سول اتے عسکری اداریں دے نال مکمل رابطے اچ اے اتے سارے متعلقہ اداریں ولوں جاری امدادی کاروائیاں دی ہر ویلھے نگرانی کریندا پئے۔ زور دے مینھ، چھل ، لینڈ سلائیڈنگ اتے آسمانی بجلی ڈھݨ دے اڄوکے واقعیں پاروں خیبر پختونخوا اچ 328 لوک جاں بحق تھئن جݙاں جو صوبے دے مختلف ضلعیں اچ تھیوݨ آلے مینھ دے نتیجے اچ 143 لوک زخمی تھئن۔ این ڈی ایم اے مزید آکھیے جو مینھ اتے چھل دی صورتحال پاروں ملک اچ گزریل 48 گھنٹے دے دوران 344 لوک جاں بحق جݙاں جو 148 زخمی تھئن۔ این ڈی ایم اے ہدایت کیتی اے جو شمالی علاقہ جات اچ ممکنہ مینھ دی صورت اچ لینڈ سلائیڈنگ دے واقعیں اچ مزید ودھارے دا امکان اے، مینھ اتے چھل دے دوران محتاط رہو اتے حفاظتی اقدامات یقینی بݨاؤ۔ سیاح حضرات توں درخواست کیتی ڳئی اے جو اڳوں 5 توں 6 ݙینھ تئیں شمالی علاقہ جات دا سفر کرݨ توں پرہیز کرن۔ متاثرہ علاقیں اچ پی ڈی ایم اے سودھے پاک آرمی، ضلعی انتظامیہ، ریسکیو 1122 اتے مقامی رضاکار امدادی کارروائیاں اچ مصروف ہن۔