وفاقی وزیر ریلوے محمد حنیف عباسی دا عوام ایکسپریس دے واقعہ دا نوٹس، ست ݙینھ وچ رپورٹ منڳ ڳھدی

اسلام آباد۔17اگست(اے پی پی)وفاقی وزیر ریلوے محمد حنیف عباسی پشاور توں کراچی ونڄݨ آلی عوام ایکسپریس دے واقعہ دا نوٹس ڳھندے ہوئیں ست ݙینھ وچ رپورٹ پیش کرݨ دی ہدایت کیتی اے۔ وزارت ریلوے موجب عوام ایکسپریس دا واقعہ لودھراں ریلوے اسٹیشن دے نیڑے پیش آئے، حادثے پاروں 2 کوچاں پٹڑی توں لتھیاں اتے لگیج وین سودھے 3 ٻوگھیاں الٹ ڳئیاں۔ اطلاع موجب ہک مسافر جاں بحق جݙاں جو 21 مسافر زخمی تھئن۔ وزارت ریلوے آکھیے جو ݙو شدید زخمی بہاولپور ہسپتال جݙاں جو باقی معمولی زخمی لودھراں دے ڈی ایچ کیو ہسپتال وچ طبی امداد گھندے پئن۔ وفاقی وزیر ریلوے ہک مسافر دے جاں بحق تھیوݨ تے ݙکھ دا اظہار کریندے زخمیاں دے وختی صحت یاب تھیوݨ سانڳے دعا کیتی اے۔ واضح رہے جو ڈی ایس ملتان اتے میڈیکل ٹیم حادثے دی جاہ تے پڄ ڳئن تے امدادی کماں وچ مصروف ہن تاں جو مسافراں کوں ہر قسم دیاں طبی سہولتاں ݙتیاں ونڄ سڳن۔ وفاقی وزیر ریلوے محمد حنیف عباسی ریلوے عملے کوں امدادی کم وختی مکمل کر تے ڈاؤن ٹریک بحال کرݨ دی ہدایت کیتی اے۔ حادثے آلی ریل گاݙی دے مسافراں کوں متبادل ریل گاݙی ذریعے منزل تے روانہ کر ݙتا ڳئے جݙاں جو ریل گاݙیاں کوں اپ ٹریک توں لنڳھایا ویندا پئے کوئی ریل گاݙی متاثر کائنی تھئی۔ وزیر ریلوے حادثے دی انکوائری دا حکم ݙیندے ہوئیں آکھیے جو ست ݙینھ اچ رپورٹ پیش کیتی ونڄے