جلال پور پیروالا اچ سیلابی صورتحال، شہریاں دے انخلا کیتے ریسکیو آپریشن رات توں جاری

ملتان۔ 08 ستمبر (اے پی پی) جلال پور پیر والا اچ رات بھر جاری رہݨ آلا ریسکیو آپریشن ہݨ تئیں جاری اے۔ سیلابی صورتحال پاروں انتظامیہ، ریسکیو 1122، پولیس، سول ڈیفنس اتے ٻئے ادارے مسلسل کم کریندے پئن۔ کمشنر ملتان ڈویژن عامر کریم خان ساری رات موقع تے موجود رہیے اتے سویلے تئیں وی ریسکیو آپریشن دی نگرانی کریندے رہیے۔ انہاں دے نال ڈپٹی کمشنر اتے سی پی او وی متاثرہ علاقیاں وچ موجود ہن۔ کمشنر عامر کریم خان آکھیا جو سیلاب توں متاثرہ شہریاں دے انخلا تئیں آپریشن بلا تعطل جاری رہسی۔ انہاں آکھیا جو محفوظ علاقیاں اچ لوکاں دی منتقلی دا عمل تیز رفتاری نال پورا کیتا ویندا پئے۔ ایں موقع تے انہاں ݙسایا جو وزیراعلیٰ پنجاب ریسکیو اتے ریلیف آپریشن دی براہِ راست آن لائن مانیٹرنگ کریندی پئی اے اتے ہر ویلھے دی صورتحال توں آگاہ اے۔ انتظامیہ دے مطابق شہریاں کوں محفوظ علاقیاں اچ منتقل کرݨ کیتے ریسکیو ٹیماں دی تعداد ودھا ݙتی ڳئی اے جڈانجو پولیس اتے سول ڈیفنس اہلکار وی آپریشن وچ مدد ݙیندے پئن۔ کمشنر آکھیا جو متاثرہ لوکاں دی حفاظت پہلی ترجیح اتے ایں ویلھے تئیں کوششاں جاری رہسن جݙاں تئیں سارے شہری محفوظ علاقیاں تئیں نہ پڄ ویسن۔