معیشت دے اہم اشارے درست سمت اچ ہن، اصلاحات اتے نجکاری نال طویل المدتی استحکام کیتے بنیاد فراہم تھیندی پئی اے، وفاقی وزیر خزانہ دی پاکستان بزنس کونسل دے وفد نال ملاقات

اسلام آباد۔10ستمبر (اے پی پی) وفاقی وزیر خزانہ تے محصولات سینیٹر محمد اورنگزیب آکھیا جو حکومت کلی معیشت دے استحکام کوں برقرار رکھݨ کیتے پرعزم اے، کاروبار تے سرمایہ کاری کیتے چنڳا ماحول پیدا کرݨ تے توجہ ݙیندی پئی اے، وزیراعظم دے اڄوکے دورہ چین نال ݙو پاسہ معاشی تعلقات کوں ٻیا ودھارا ملسی، افراط زر کوں قابو اچ رکھݨ کیتے مؤثر نگرانی کیتی ویندی پئی اے۔ انہاں اے ڳالھ بدھ کوں اتھاں پاکستان بزنس کونسل دے وفد نال ملاقات اچ آکھی۔ وفد دی قیادت کونسل دے چیف ایگزیکٹو آفیسر جاوید قریشی اتے چیئرپرسن ڈاکٹر زیلاف منیر کریندے پئن۔ وزیر خزانہ وفد دا خیرمقدم کیتا اتے انہاں کوں پاکستان دی اڄوکے معاشی صورتحال بارے بریفنگ ݙتی۔ انہاں آکھیا جو معیشت دے اہم اشارے درست سمت اچ ہن۔ وزیر خزانہ ریاستی ملکیتی اداریاں اچ اصلاحات، نجکاری پروگرام اتے عوامی شعبے کوں بہتر بݨاوݨ سودھے حکومت دے اصلاحات دے ایجنڈے دا ذکر کیتا اتے آکھیا جو ایں اقدامات نال طویل المدتی استحکام کیتے بنیاد فراہم تھیندی پئی اے۔ انہاں معاشی استحکام دی اہمیت تے زور ݙیندیں ہوئیں شرح مبادلہ اتے پالیسی ریٹ اچ استحکام دا ذکر وی کیتا اتے آکھیا جو ایں رجحانات دے مستقبل اچ وی جاری رہݨ دی امید اے جو ملک اچ طویل المدتی معاشی استحکام کیتے ضروری اے۔ انہاں آکھیا جو حکومت کلی معیشت دے استحکام برقرار رکھݨ کیتے پرعزم اے اتے کاروبار تے سرمایہ کاری کیتے چنڳا ماحول پیدا کرݨ تے توجہ ݙیندی پئی اے۔ انہاں بندرگاہیں، سڑکاں اتے ریلوے دے بنیادی ڈھانچے کوں جدید بݨاوݨ دی اہمیت تے زور ݙتا اتے آکھیا جو ایں نال ملکی تجارت کوں ودھارا ݙیوݨ اتے برآمدی موقع ودھائے ونڄ سڳدن۔ وزیر خزانہ وفد کوں امریکا دے نال جاری ٹیرف مذاکرات بارے آگاہ کیتا جنہاں نال پاکستانی برآمد کنندگان کوں خطے اچ ابھردے ہوئے مسابقتی فائدیاں دی بنیاد تے اہم موقع حاصل تھی سڳدن۔ وزیر خزانہ آکھیا جو صورتحال نال نٻڑݨ کیتے 2020 دے سیلاب توں حاصل شدہ تجربات توں فائدہ ڳھدا ویندا پئے۔ وزیر خزانہ ایں اعتماد دا اظہار کیتا جو افراط زر دی صورتحال قابو اچ رہسی کیوں جو عالمی منڈی اچ تیل دی قیمتاں اچ ڳھٹکی نال درآمدی مہانگ ڳھٹ تھئی اے۔ انہاں ݙسایا جو حکومت صورتحال تے نظر رکھی ہوئی اے اتے مہانگ بارے وزیراعظم دی قائم کیتی ڳئی سٹیئرنگ کمیٹی دا پہلا اجلاس وی تھی ڳئے، جݙاں جو ݙوجھا اجلاس ایں ہفتے متوقع اے۔ پاکستان بزنس کونسل دے وفد وزیر خزانہ دے خیالات دی تائید کریندیں ہوئیں حکومت دی اقتصادی پالیسیاں اتے اصلاحات دے اقدامات دی تعریف کیتی۔ وفد پالیسی تحقیق اتے تیاری اچ حکومت کوں مکمل تعاون دی یقین ݙیوائی اتے مسلسل مشاورت اتے تعمیری ݙائیلاگ کیتے آپݨے عزم دا اعادہ کیتا۔