پاکستان اچ بارشاں اتے سیلاب دی وجہ نال 60 لکھ لوک متاثر، 25 لکھ بے گھر تھی ڳئن، عالمی برادری ایں انسانی بحران نال نبڑݨ کیتے امداد ݙیوے، اقوام متحدہ

اقوام متحدہ۔17ستمبر (اے پی پی) اقوام متحدہ آکھیا جو پاکستان اچ اڄوکی مون سون بارشاں اتے انہاں دے نتیجے اچ سیلاب دی وجہ نال 60 لکھ توں ودھ لوک متاثر جݙاں جو 25 لکھ توں ودھ بے گھر تھی ڳئن، سیلاب توں متاثرہ علاقیاں دی صورتحال “شدید انسانی بحران” دی شکل اختیار کر ڳئی اے، عالمی برادری ایں بحران نال نٻڑݨ کیتے امداد ݙیوے۔ اے ڳالھ اقوام متحدہ دے ادارہ برائے انسانی معاملیاں (او سی ایچ اے) دے سربراہ کالوس گیہا آپݨی اڄوکی رپورٹ اچ آکھی۔ انہاں آکھیا جو پاکستان اچ ریکارڈ مون سون بارشاں اتے سیلاب تباہی مچا ݙتی جئیں اچ 60 لکھ توں ودھ لوک متاثر اتے 25 لکھ توں ودھ بے گھر تھین۔ انہاں اڄوکی صورتحال کوں “شدید انسانی بحران” قرار ݙیندے ہوئیں تیکھی عالمی امداد دی اپیل کیتی۔ کارلوس گیہا آکھیا جو پاکستان دے علاقیاں پنجاب، خیبرپختونخوا اتے گلگت بلتستان اچ آوݨ آلے سیلاب مقامی آبادی کوں پورے طور تے بے سہارا کر ݙتے اتے جو کجھ اساں ݙیکھدے پئیوں او صرف آغاز اے، اصل تباہی ایں توں ودھ اے۔ رپورٹ دے مطابق جون دے چھیکڑ توں شروع تھیوݨ آلی شدید بارشاں دی وجہ نال ہݨ تئیں ہک ہزار دے نیڑے لوک ہلاک تھی ڳئں جنہاں اچ 250 ٻال وی شامل ہن، سیلاب سب توں ودھ نقصان پنجاب کوں پڄایا ہے جتھاں بھارت دی ولوں ڈیم توں پاݨی چھڑݨ دے بعد دریاواں تباہی مچائی اتے 47 لکھ لوک متاثر تھئے، کئی علاقیاں اچ پوری پوری وستیاں پاݨی اچ بݙ ڳئن، سڑکاں اتے پل تباہ تھی ڳئن جݙاں جو 2.2 ملین ہیکٹر زرعی زمین وی پاݨی دے ہیٹھاں آ ڳئی اے، کنڑخ دے آٹے دی قیمت اچ صرف ستمبر دے پہلے ہفتے اچ 25 فیصد وادھا ݙیکھݨ اچ آیا۔ کارلوس گیہا آکھیا جو اے او کسان ہن جو پورے ملک دا پیٹ پلیندے ہن اڄ انہاں کول نہ زمین اے، نہ ڈھور اتے نہ ہی کوئی سہارا اے۔ انہاں دا آکھݨ ہا جو اقوام متحدہ تیکھی امداد کیتے 5 ملین ڈالر جاری کیتے ہن جݙاں جو ٻئے 1.5 ملین ڈالر مقامی این جی اوز کوں ݙتے ڳئن، حکام دا آکھݨ اے جو کئی علاقے ہالی وی پورے طور تے کٹیے ہوئے ہن جتھاں امدادی سامان صرف کِشیاں یا ہیلی کاپٹراں دے ذریعے پڄایا ویندا پئے۔ انہاں آکھیا جو سیلاب دی وجہ نال ملیریا، ڈینگی اتے ہیضے سویں بیماریاں کھنڈݨ دا خطرہ ودھدا ویندا پئے جݙاں جو پاݨی، خوراک، دوائیاں اتے پناہ گاہواں دی شدید لوڑھ اے۔ انہاں آکھیا جو اصل چیلنج اڳلا مرحلہ اے جݙاں انہاں متاثرین کوں ولوں زندگی دی طرف واپس گھن آوݨا پوسی۔ انہاں عالمی برادری کوں یاد ݙیوایا جو اے پاکستان دی غلطی نئی بلکہ او ملک جو موسمیاتی تبدیلی دے ذمے دار ہن انہاں کوں ایں بحران دی ذمے واری وی چاوݨی پوسی۔