دریائے راوی، ستلج اتے چناب اچ چھل پاروں تھیوݨ آلے نقصانات دی رپورٹ جاری

لاہور۔17ستمبر (اے پی پی) پی ڈی ایم اے پنجاب دریائے راوی، ستلج اتے چناب اچ چھل پاروں تھیوݨ آلے نقصانات دی رپورٹ جاری کر ݙتی۔ دریائے راوی، ستلج اتے چناب اچ شدید سیلابی صورتحال دی وجہ نال 47 سو توں ودھ موضع جات متاثر تھی چکین۔ ریلیف کمشنر پنجاب نبیل جاوید ایں بارے ݙسایا جو دریاواں اچ سیلابی صورتحال دی وجہ نال کل ملا تے 47 لکھ 23 ہزار لوک متاثر تھئن۔ شدید سیلاب توں متاثرہ ضلعیاں اچ متاثرین کیتے 337 ریلیف کیمپس، 429 میڈیکل کیمپس وی قائم کیتے ڳئے ہن جݙاں جو سیلاب اچ پھسے ہوئے 26 لکھ 11 ہزار لوکاں کوں محفوظ جہیں تے منتقل کیتا ڳئے۔ ایں توں علاوہ ڈھوراں کوں علاج دی سہولت ݙیوݨ کیتے 368 ویٹرنری کیمپس قائم کیتے ڳئن اتے متاثرہ ضلعیاں اچ ریسکیو تے ریلیف سرگرمیاں اچ 20 لکھ 89 ہزار زناوراں کوں محفوظ جہیں تے منتقل کیتا ڳئے۔ ریلیف کمشنر پنجاب ݙسایا جو منگلا ڈیم 95 فیصد جݙاں جو تربیلا ڈیم 100 فیصد، دریائے ستلج تے موجود انڈین بھاکڑا ڈیم 88 فیصد تئیں بھر ڳئے جݙاں جو پونگ ڈیم 94 فیصد، تھین ڈیم 88 فیصد تئیں بھر ڳئے۔ انہاں ݙسایا جو اڄوکے سیلاب توں مختلف حادثیاں اچ 118 شہری ہلاک تھئن، وزیراعلیٰ پنجاب دی ہدایت دے مطابق شہریاں دے نقصانات دا ازالہ کیتا ویسی اتے سیلاب دی وجہ نال تھیوݨ آلے نقصانات دا اندازہ لاوݨ کیتے سروے جلدی کیتا ویسی۔ سروے پورا تھیوݨ تے شفافیت اتے سوکھے طریقے نال شہریاں دے نقصانات دا ازالہ کیتا ویسی۔