کمشنر ملتان دا سیلاب توں متاثر تھیئے علاقیاں اچ نقصانات دا تخمینہ لاوݨ کیتے سروے ہک مہینے اچ مکمل کرݨ دا حکم

ملتان۔ 22 ستمبر (اے پی پی) کمشنر ملتان ڈویژن عامر کریم خاں تمام ڈپٹی کمشنرز کوں فوری طور تے سیلاب نال متاثر تھیئے علاقیاں دا سروے شروع کرݨ دے احکامات جاری کیتن تانجو نقصانات دا تخمینہ موضع دی سطح تے لاتا ونڄے تے متاثرہ خانداناں دی درست تفصیلات حاصل کیتی ونڄ سڳے۔ کمشنر ݙسایا جو مشترکہ سروے ٹیماں تشکیل ݙتی ویندی پئن جنہاں اچ فوج تے سول اداریاں دے نمائندے شامل تھیسن۔ انہاں ٹیماں دی ذمہ داری ہوسی جو او انسانی جاناں دے ضائع تھیوݨ، زخمی تھیوݨ، مکانات دی تباہی، کھڑی فصلاں تے مال مویشیاں دے نقصانات دی تفصیلات جمع کریسن۔ ایں مقصد کیتے اربن یونٹ دی اینڈرائڈ ایپلیکیشن استعمال کیتی ویسی جڈانجو ڈیٹا دی تصدیق نادرا، پی ایل آر اے تے ݙوجھے اداریاں نال کیتی ویسی۔ اہل متاثرین کوں معاوضے دی ادائیگی بینک آف پنجاب دے ذریعے کیتی ویسی۔ ڈسبرسمنٹ سینٹراں اچ بائیو میٹرک دی تصدیق تے فوری ادائیگی دی سہولت فراہم کیتی ویسی۔ کمشنر ݙسایا جو سروے ہک مہینے دے اندر مکمل کرݨ دی ہدایت ݙتی ڳئی اے جڈانجو شفافیت یقینی بݨاوݨ کیتے روزانہ رپورٹنگ تے سخت نگرانی کیتی ویسی۔ انہاں دے علاوہ، ضلعی سطح تے ایڈیشنل ڈپٹی کمشنرز ریونیو تے تحصیلی سطح تے اسسٹنٹ کمشنرز فوکل پرسن دے طور تے کم کریسن۔ شکایات دے ازالے کیتے ڈیش بورڈ تے کمیٹی قائم تھیسی جو ہفتے دے اندر فیصلہ کریسی۔