پاکستان بنگلہ دیش کوں ہرا تے ایشیا کپ دے فائنل اچ پڄ ڳیا

دبئی۔26 ستمبر(اے پی پی)ایشیا کپ سپر فور مرحلے دے اہم میچ اچ پاکستان بنگلہ دیش کوں 11 رن نال ہرا تے فائنل کیتے کوالیفائی کر ڳھدے۔ فائنل اچ ہک واری ول روایتی حریف بھارت نال جوڑ بݨسی۔ پاکستان دے ݙتے ڳئے 136 رن دے ہدف دے پچھو بنگلہ دیش کرکٹ ٹیم مقررہ 20 اووراں اچ 9 وکٹاں دے نقصان تے 124 رن بݨا سڳی۔ بنگلہ دیش ولوں شمیم حسین 30 رن بݨا تے ٹاپ سکورر رہے، سیف حسن 18، نور الحسن 16، مہدی حسن 11، ذاکر علی 5، تنظیم حسن 10 اتے تسکین احمد 4 رن ٻݨائے۔ پاکستان ولوں شاہین شاہ آفریدی اتے حارث رؤف ترائے، ترائے وکٹاں، صائم ایوب 2 جݙاں جو محمد نواز ہک وکٹ ڳھدی۔ دبئی انٹرنیشنل کرکٹ سٹیڈیم اچ تھیوݨ آلے ایشیا کپ سپر فور مرحلے دے اہم میچ اچ بنگلہ دیش دے کپتان لٹن داس دے نا ہووݨ تے کپتان ذاکر علی ٹاس جِت تے پہلے پاکستان کوں بیٹنگ دی دعوت ݙتی۔ پہلے بیٹنگ کریندے پاکستان کرکٹ ٹیم مقررہ 20 اووراں اچ 8 وکٹاں دے نقصان تے 135 رن بݨائے۔ محمد حارث 31 رن نال نمایاں رہے۔ صاحبزادہ فرحان 4، صائم ایوب صفر، فخر زمان 13، حسین طلعت 3، کپتان سلمان علی آغا 19، شاہین آفریدی 19، محمد حارث 31، محمد نواز 25 جݙاں جو فہیم اشرف 14 اتے حارث رؤف 3 رن بݨا تے ناٹ آؤٹ رہے۔ بنگلہ دیش ولوں تسکین احمد 3، رشاد حسین اتے مہدی حسن ݙو، ݙو وکٹاں ڳھدیاں۔ بنگلہ دیش کوں ہراوݨ دے بعد پاکستان ایشیا کپ دے فائنل اچ پڄݨ آلی ݙوجھی ٹیم بݨ ڳئی جیڑھی آݙت کوں بھارت نال مقابلہ کریسی۔ پاکستان اتے بھارت دیاں ٹیماں پہلی واری ایشیا کپ دے فائنل اچ مقابلے تے ہوسن۔