امریکی صدر نال عالمی رہنماواں دیاں ملاقاتاں، ٹرمپ غزہ معاہدے تیکھے طے تھیوݨ دی خوشخبری سݨا ݙتی

واشنگٹن۔ 26 ستمبر( اے پی پی)امریکی صدر ڈونلڈ ٹرمپ، نیتن یاہو سودھا مشرق وسطیٰ اتے مسلم رہنماواں نال ملاقات خاص کر چینی صدر شی جن پنگ اتے ترکیہ دے صدر رجب طیب اروان نال ملݨ کوں اکوں چنڳا قرار ݙیندے آکھیے جو غزہ تے ڳالھ مہاڑ چنڳی رہی اے، یرغمالیاں دی رہائی دا معاملہ تیکھے ممکن اے۔ اوول آفس واشنڳٹن ڈی سی اچ میڈیا نال ڳالھ مہاڑ کریندے امریکی صدر ڈونلڈ ٹرمپ دا آکھݨ ہا جو غزہ دی صورتحال ٻہوں خراب اے، اساں یرغمالیاں دی تیکھے واپسی چاہندے ہیں۔ انہاں میڈیا کوں اپݨیاں عالمی رہنماواں نال ملاقاتاں اتے ایندے اچ تھیوݨ آلی پیش رفت دا ݙسایا اتے آکھیا جو اے ملاقاتاں فیدہ مند رہین۔ انہاں آکھیا جو انہاں ملاقاتاں اچ ݙوطرفہ تعلقات، خطے اتے عالمی امن و استحکام سانڳے کوششاں اتے عالمی تنازعات حل کرݨ سانڳے مشترکہ اقدامات دے امکانات تے ڳالھ تھئی اے۔ ایں توں پہلے امریکی صدر ڈونلد ٹرمپ ٹک ٹاک بارے “مدر اینڈ فیملی ایگزیکٹو آرڈر” دے صدارتی حکمنامے تے دستخط کر ݙتن۔ حکمنامے دا مقصد ٹک ٹاک بارے سیکیورٹی خدشات دور کرݨ اتے صارفین دا ڈیٹا محفوظ ٻݨاوݨ دے اقدامات کرݨ اے۔ انہاں آکھیا جو میں چینی صدر دی وݙی عزت کرینداں، چین 14 ارب ڈالر دے معاہدے سودھا ساݙے نال مختلف معاملات تے مکمل تعاون کریندا پئے، امریکی سرمایہ کار ٹک ٹاک دی ملکیت سنٻھلیندے پین۔ انہاں آکھیا جو ٹیکسز نال قومی خزانے اچ بہتری آندی پئی اے۔ انہاں آکھیا جو ترکیہ نال دفاعی سازو سامان دی خریداری تے ڳالھ مہاڑ تھئی۔ انہاں روس دے یوکرین دے حوالے نال اقدامات تے چنتا کریندے آکھیے جیویں روس اتے صدر پیوٹن دا رویہ اے میں ایندے تے مطمئن کائنی۔