فرانس تے سعودی شراکت نال اقوام متحدہ دے 142 اراکین فلسطین دے ݙو ریاستی حل کیتے ووٹ ݙتا، صدر میکرون

پیرس، 26 ستمبر (اے پی پی) فرانس دے صدر ایمانویل میکرون آکھیا جو فرانس تے سعودی عرب دی شراکت داری نال اقوام متحدہ دے 142 اراکین مسئلہ فلسطین دے ݙو ریاستی حل کیتے ووٹ ݙتا۔ العربیہ اردو دے مطابق انہاں العربیہ کوں خصوصی انٹرویو ڈیندیں ہوئیں آکھیا جو سعودی عرب دی کوششاں تے تعاون نال کامیابی ملدی پئی اے تے اے ہک تاریخی مرحلہ اے جو فلسطینی ریاست کوں تسلیم کرݨ کیتے تیزی نال کم تھیندا پئے۔ ایں توں سعودی عرب نال اساݙے تعلقات ٻہوں مضبوط تھی ڳئن، ایں وجہ توں نیو یارک اچ کانفرنس دے انعقاد دا فیصلہ تھیا تے فلسطین دے مسئلے کوں حل کرݨ تے زور ݙتا ڳیا۔ ایمانویل میکرون زور ݙیندیں ہوئیں آکھیا جو نیو یارک کانفرنس دا اعلامیہ سعودی عرب نال مضبوط تعلقات دے نتیجے اچ ساممے آئے، تاںجو غزہ اچ جنگ بندی تھی سڳے۔ اے ہک جامع تے قابل عمل فریم ورک اے جیندے ذریعے ݙو ریاستی حل دا نفاذ ممکن تھیسی۔ خطے اچ امن تے سلامتی دا فیدہ ساریاں کوں ملسی۔ انہاں آکھیا جو اے دستاویز ہک ایں خاکے دا اظہار اے جو غزہ اچ جنگ دے خاتمے دے عزم کوں ظاہر کریندی اے تے ہک پرامن تے پائیدار حل دے راہ لیندی اے۔ انہاں دے اے خیالات انہاں دی جنرل اسمبلی اچ تقریر دے نال سامݨے آئن جتھ انہاں فلسطینی ریاست کوں تسلیم کرݨ دا اعلان کیتا تے ایں وݙے گروپ دا حصہ بݨ ڳئن جیہڑے فلسطینی ریاست کوں تسلیم کرݨ دا اعلان کیتے۔