ڈویژن اچ چھل متاثرین دے نقصان دے تخمینے کیتے سروے شروع، 267 ٹیماں بݨائی ڳئن، کمشنر ملتان

ملتان، 26 ستمبر (اے پی پی) کمشنر ملتان ڈویژن عامر کریم خان آکھیا جو اڄ توں چھل متاثرین دے نقصانات دے تخمینے کیتے جامع سروے دا آغاز کر ݙتا ڳئے۔ ایں سروے اچ انسانی جاناں دے ضیاع، زخمیاں، مکاناں، کھڑی فصلاں تے مویشیاں دے نقصانات دا تفصیلی ریکارڈ مرتب کیتا ویسی تاںجو متاثرہ خانداناں کوں معاوضہ بروقت تے شفاف انداز نال ݙتا ونڄ سڳے۔ انہاں ݙسایا جو ملتان ڈویژن اچ مجموعی طور تے 267 ٹیماں بݨائی ڳئن جنہاں اچ ملتان 89، وہاڑی 67، خانیوال 85 تے لودھراں 26 ٹیماں شامل ہن۔ ہر ٹیم روزانہ دی بنیاد تے متاثرہ علاقیاں اچ ونڄ تے معلومات کٹھی کریسی۔ اے تفصیلات ہک اینڈرائڈ ایپ تے اپ لوڈ تھیسن جنہاں دی نادرا تے ٻئے متعلقہ اداریاں نال تصدیق دے بعد اہل متاثرین کوں معاوضہ ݙیوݨ ممکن بݨایا ویسی۔ عامر کریم خان آکھیا جو معاوضے دی رقم بینک آف پنجاب دے ذریعے ݙتی ویسی۔ ایں مقصد کیتے ڈسبرسمنٹ سینٹر قائم کیتے ویندے پئن جتھ بائیو میٹرک تصدیق دے بعد فوری ادائیگی دی سہولت موجود ہوسی۔ انہاں آکھیا جو اے سروے ہک مہینے دے اندر مکمل کر گھدا ویسی تاںجو متاثرین کوں ڈیرہ دے بغیر ریلیف مل سڳے۔ کمشنر واضح کیتا جو شکایات دے ازالے کیتے ہک ڈیش بورڈ کمیٹی قائم کیتی ڳئی اے جو ست ݙینہہ دے اندر فیصلہ کریسی۔ انہاں ساری ٹیماں کوں ہدایت کیتی جو روزانہ دی رپورٹنگ اچ شفافیت کوں یقینی بݨایا ونڄے تے نقصانات دے تخمینے اچ کہیں قسم دی کوتاہی ہرگز برداشت نہ کیتی ویسی۔