چھل کسان دی چیل بھن ݙتی، فیوچر مارکیٹنگ دی لوڑھ: صدر پاکستان کسان اتحاد

ملتان28۔ستمبر(اے پی پی) پاکستان کسان اتحاد دے مرکزی صدر خالد محمود کھوکھر آکھیے جو چھل زرعی رقبے کوں تباہ کرتے کسان دی چیل بھن ݙتی اے ۔ ایں ضیان دا واحد حل اے ہے جو معاشی تے زرعی ترقی کوں فیوچر مارکیٹنگ نال بہتر کیتا ونڄے تاں جو کسان آپݨے پیراں تے ولدا کھڑا تھی سڳے۔ ملتان پریس کلب وچ میڈیا نال ڳالھ کریندے خالد محمود کھوکھر ساریاں وݙیاں سیاسی جماعتاں توں اپیل کیتی جو او رل ٻہہ تے پاکستان دی معاشی تے زرعی ترقی کیتے کم کرن تاں جو کاشتکاراں تے عوام کوں مہانگ توں بچایا ونڄ سڳے۔ انہاں آکھیا جو کاشتکاراں کیتے کھاد تے بجلی دی قیمت وچ کمی ویلھے دی لوڑھ اے۔ جے ایویں نہ کیتا ڳٰا تاں کݨک کپاہ دی پیداوار گھٹ تھیوݨ دا ݙر اے ۔ انہاں آکھیے اساݙی خواہش اے جو ایں واری وی ودھ  توں ودھ کݨک رادھی ونڄے تاں جو لوکاں کوں اٹے دیاں لائناں وچ کھڑے نہ تھیوݨا پووے۔ خالد کھوکھر آکھیا جو اساں سارے پاکستانی ہیسے، چھل آلے علاقیں اچ اساں کنے صوبائی تعصب توں ہٹ تے متاثرین دی مدد کرݨی چاہیدی اے۔ انہاں پیپلز پارٹی تے مسلم لیگ ن تے تنقید کریندے آکھیا جو اے ویلھا اتحاد دا ویلھا اے، ہک ݙوجھے تے لفظی گولہ باری دا کائنی۔ جے ݙوہیں جماعتاں دی طرفوں سمجھداری دا مظاہرہ نہ کیتا ڳیا تاں عام آدمی دے نال نال کسان وی اوکھے ویلھے دا سامݨا کریسی اساݙا مقصد ملک توں بیروزگاری دا خاتمہ اے۔ تعلیم تے صحت تے کاشتکار تے توجہ ݙے تے اساں ملکی ترقی کیتے کردار ادا کر سڳدوں ۔ انہاں آکھیا کسان ہݨ حکومت تے مخیر حضرات کنے ݙیہدا پئے، حکومت کوں چاہیدے جو او بہترین ریسرچ تے منصوبہ بندی ناں کاشتکاراں کوں سنبھالے۔