ای سی سی اجلاس؛ اسلام آباد اچ ڈیفنس کمپلکس ٻݨاوݨ کیتے اراضی مالکاں دے معاوضے کیتے 4 ارب روپے ݙیوݨ دی منظوری

اسلام آباد۔2اکتوبر (اے پی پی)کابینہ دی اقتصادی رابطہ کمیٹی (ای سی سی) اسلام آباد اچ ڈیفنس کمپلکس دی تعمیر کیتے حاصل کیتی ڳئی اراضی دے مالکاں کوں نقد معاوضے دی ادائیگی کیتے 4 ارب روپے دی تکنیکی ضمنی گرانٹ دی منظوری ݙے ݙتی۔ کابینہ دی اقتصادی رابطہ کمیٹی (ای سی سی) دا اجلاس وفاقی وزیر خزانہ و محصولات سینیٹر محمد اورنگزیب دی زیر صدارت تھیا۔ اجلاس اچ وزارت داخلہ ولوں نیویارک اچ واقع روزویلٹ ہوٹل کیتے تکنیکی ضمنی گرانٹ دی صورت اچ مالی معاونت بارے سمری تے غور کیتا ڳیا۔ ہوٹل اتے نیویارک سٹی وچال لیز معاہدے دے مکݨ دے بعد اے معاونت لوڑھ ہوسی۔ کمیٹی ہوٹل دی فوری مالی ضروریات کوں پورا کرݨ دی حمایت کیتی تے وزارت کوں ہدایت ݙتی جو تخمینیاں دا ازسرنو جائزہ گھن تے معاملہ ولدا ای سی سی اچ پیش کیتا ونڄے۔ اجلاس اچ وزارت دفاع ولوں اسلام آباد اچ ڈیفنس کمپلکس دی تعمیر کیتے حاصل کیتی ڳئی اراضی دے مالکاں کوں نقد معاوضے دی ادائیگی کیتے فنڈز دی فراہمی دی سمری تے وی غور کریندے ای سی سی ایں سانڳے 4 ارب روپے دی تکنیکی ضمنی گرانٹ دی منظوری ݙتی جیڑھی وزارت خزانہ ݙیسی، جݙاں جو باقی رقم کیپیٹل ڈویلپمنٹ اتھارٹی (سی ڈی اے) دے ذمے ہوسی۔ اجلاس اچ وزارت داخلہ و انسداد منشیات ولوں امن و امان دے قیام کیتے 20 ارب روپے دی تکنیکی ضمنی گرانٹ دا جائزہ وی گھدا ڳیا۔ کمیٹی تجویز دی منظوری ݙیندے ہوئے فیصلہ کیتا جو اے فنڈز وزارت خزانہ ولوں وزارت داخلہ نال مشاورت دے بعد ضرورت دے مطابق اے مرحلہ وار جاری کیتے ویسن۔ ایںدے علاوہ ای سی سی وزارت داخلہ کیتے 17 کروڑ 48 لکھ روپے دی مزید فنی ضمنی گرانٹ وی منظور کیتی تاں جو فرنٹیئر کور خیبرپختونخوا (شمال) ہیڈ کوارٹر پشاور کوں امن و امان قائم رکھݨ دیاں کوششاں اچ مدد ݙتی ونڄ سڳے۔ کمیٹی وزارت تجارت ولوں پیش کیتے ڳئے ایس آر او دے مسودے دی منظوری ݙتی جیندا مقصد افغانستان، ایران اتے روس نال ݙو طرفہ تجارت کیتے بزنس ٹو بزنس بارٹر ٹریڈ دے طریقہ کار اچ ترامیم کیتاں ویسن۔ اجلاس اچ وفاقی وزیر پٹرولیم علی پرویز ملک، وزیر تجارت جام کمال خان، وفاقی وزیر برائے سرمایہ کاری ثاقت احمد شیخ، وزیراعظم دے مشیر برائے نجکاری تے چیئرمین نجکاری کمشنر محمد علی، وفاقی سیکرٹریز اتے متعلقہ وزارتاں سودھا ریگولیٹری اداریاں دے سینئر حکام شرکت کیتی