ڈیرہ غازی خان، پولیس مقابلے اچ خطرناک اشتہاری آپݨے ساتھیاں دی فائرنگ نال ہلاک

ڈیرہ غازی خان ۔ 08 اکتوبر (اے پی پی) ڈیرہ غازی خان دے تھانہ کالا دی حدُود اچ رات گئے پولیس اتے جرائم پیشہ عناصر وچال فائرنگ دا تبادلہ تھیا جئیں دے نتیجے اچ اقدامِ قتل اتے ڈکیتی دی کئی وارداتاں اچ مطلوب خطرناک اشتہاری ملزم عمر عرف عمر کھوسہ ہلاک تھی ڳیا۔ پولیس ترجمان دے مطابق ایس ایچ او تھانہ کالا معہ نفری معمول دی گشت تے ہن جو کچھی کینال کوچھہ کو کاری روڈ تے ترائے مسلح بندے موٹرسائیکل تے سوار نظر آئے۔ پولیس کوں ݙیکھدے ای ملزماں سِدھی فائرنگ شروع کر ݙتی۔ پولیس حکمتِ عملی دے تحت محفوظ پوزیشنز سنبھال تے حفاظتِ خود اختیاری اچ جوابی فائرنگ کیتی اتے فوری طور تے امدادی نفری کوں وی سݙ گھدا۔ فائرنگ دا تبادلہ کجھ دیر جاری رہیا۔ بعد اچ سرچ آپریشن اچ پتہ لڳیا جو اشتہاری ملزم عمر عرف عمر کھوسہ آپݨے ای ساتھیاں دی فائرنگ نال ہلاک تھی ڳئے۔ موقع توں ہک موٹرسائیکل اتے کلاشنکوف برآمد کر ڳھدی ڳئی جݙاں جو ٻئے ملزم بھڄݨ اچ کامیاب تھی ڳئن۔ پولیس دے مطابق ہلاک ملزم اقدامِ قتل، ڈکیتی اتے ٻئے سنگین جرماں اچ مطلوب ہا۔ بھڄݨ آلے ملزماں دی تلاش جاری اے اتے انہاں دی گرفتاری کیتے مختلف جہیں تے چھاپے مارے ویندے پئن۔