غزہ اچ جنگ بندی کیتے تاریخی امن معاہدے تے دستخط تھی ڳئن

شرم الشیخ ۔13اکتوبر(اے پی پی)غزہ اچ جنگ بندی کیتے تاریخی امن معاہدے تے دستخط تھی ڳئن۔ امریکی صدر ڈونلڈ ٹرمپ اتے مصری صدر عبدالفتاح السیسی دی خصوصی دعوت تے غزہ امن معاہدے تے دستخط دی تقریب اچ وزیراعظم محمد شہباز شریف وی شرکت کیتی۔ امریکی صدر ڈونلڈ ٹرمپ، مصری صدر عبدالفتاح السیسی، امیر قطر شیخ تمیم بن حمد الثانی، ترکیہ دے صدر رجب طیب ایردوان عالمی رہنماواں دی موجودگی اچ غزہ امن معاہدے تے دستخط کیتے۔ امریکی صدر ڈونلڈ ٹرمپ ایں موقع تے آپݨے خطاب اچ ترکیہ، مصر، قطر سودھے دوست ملکاں دے رہنماواں دا شکریہ ادا کیتا اتے آکھیا جو انہاں دیاں کوششاں نال اے امن معاہدہ ممکن تھئے جیں نال نہ صرف مشرق وسطیٰ اچ امن قائم تھیسی بلکہ سَارے رَل تے غزہ دی نویں سروں تعمیر کریسن۔ امریکی صدر آکھیا جو اڄ پوری دنیا کیتے ہک تاریخی ݙینھ اے، اے معاہدہ ٻہوں وݙی کامیابی اے۔ انہاں آکھیا جو ایہو جیہا کامیاب ݙینھ انہاں پہلے کݙاہیں نی ݙٹھا۔ انہاں آکھیا جو ایں معاہدے نال مشرق وسطیٰ اچ دیرتئیں امن قائم تھیسی۔ امریکی صدر دے معاہدے تے دستخطاں دے بعد شرکاء تاڑیاں وڄا تے معاہدے دا خیر مقدم کیتا۔