امریکا دے نال ٹیرف معاہدے تے کامیاب مذاکرات خوش آئند ہن، ملک دی ترقی اچ نجی شعبے کوں قائدانہ کردار ادا کرݨا پوسی، وزیر خزانہ محمد اورنگزیب دی امریکا اچ ملاقاتاں اچ ڳالھ مہاڑ

واشنگٹن۔14اکتوبر (اے پی پی) وفاقی وزیرِ خزانہ سینیٹر محمد اورنگزیب امریکا دے نال ٹیرف معاہدے تے کامیاب مذاکرات کوں خوش آئند قرار ݙیندیں ہوئیں آکھیا جو ملک دی ترقی اچ نجی شعبے کوں قائدانہ کردار ادا کرݨا پوسی، حکومت کاروباری طبقے کوں پیش آوݨ آلی اوکھ دا پتہ اے اتے انہاں کوں ودھ توں ودھ ریلیف ݙیوݨ کیتے اقدامات کریندی پئی اے۔ انہاں اے ڳالھ واشنگٹن ڈی سی اچ امریکی محکمہ خزانہ دے اسسٹنٹ سیکرٹری برائے بین الاقوامی مالیات رابرٹ کیپ روتھ اتے مشیر جوناتھن گرین اسٹیئن اتے یو ایس۔ پاکستان بزنس کونسل دے رہنماواں اتے ارکان نال ملاقات اچ آکھی۔ وزیرِ خزانہ اج کلھ آئی ایم ایف اتے عالمی بینک دے سالانہ اجلاساں اچ شرکت کیتے واشنگٹن اچ موجود ہن۔ امریکی محکمہ خزانہ دے اسسٹنٹ سیکرٹری برائے بین الاقوامی مالیات رابرٹ کیپ روتھ اتے مشیر جوناتھن گرین اسٹیئن نال ملاقات اچ وزیرِ خزانہ آئی ایم ایف پروگرام دے تحت پاکستان دی مضبوط معاشی بنیاداں تے روشنی پاتی اتے امریکی حکام کوں پاکستان اچ ورچوئل اثاثیاں دی ریگولیشن بارے قانون سازی دا ݙسیا۔ انہاں امریکی کمپنیاں کوں تیل تے گیس، معدنیات، زراعت اتے آئی ٹی دے شعبیاں اچ سرمایہ کاری دی دعوت وی ݙتی۔ ایں موقع تے انہاں شرکاء کوں پاکستان دے معاشی اشاریاں اچ تھیوݨ آلی بہتری توں آگاہ کریندیں ہوئیں ایں ڳالھ تے زور ݙتا جو ملک دی ترقی اچ نجی شعبے کوں قائدانہ کردار ادا کرݨا پوسی۔ وزیرِ خزانہ آکھیا جو حکومت کاروباری طبقے دی اوکھ توں واقف اے اتے انہاں کوں ودھ توں ودھ ریلیف ݙیوݨ کیتے اقدامات کریندی پئی اے۔ انہاں امریکا دے نال تھیوݨ آلے تجارتی معاہدے کوں اہم سنگِ میل قرار ݙیندیں ہوئیں آکھیا جو او امریکی کمپنیاں دے نال سرکاری تے نجی سطح تے خاص طور تے معدنیات، زراعت، آئی ٹی اتے دواسازی دے شعبیاں اچ رابطیاں دے فروغ دے خواہشمند ہن۔ سیشن دے اختتام تے انہاں شرکاء دے سوالاں دے جواب ݙیندیں ہوئیں یقین ݙیوایا جو انہاں دے جائز خدشات کوں حل کیتا ویسی۔ وزیرِ خزانہ سٹی بینک دے نمائندیاں نال وی ملاقات کیتی۔ ایں موقع تے وزیرِ خزانہ پاکستان دے نال بینک دے لمبے شراکت داری دے تعلقات کوں سراہیا اتے مسلسل تعاون تے شکریہ ادا کیتا۔ انہاں بین الاقوامی ریٹنگ ایجنسیاں دی توثیق دے نال جاری اصلاحاتی اقدامات دے نتیجے اچ پاکستان دی مستحکم معاشی صورتحال تے روشنی پاتی۔ وزیرِ خزانہ اے وی آکھیا جو پاکستان تکھی نال ڈیجیٹل اختراع اتے مالیاتی خدمات دا اُبھردے ہوئیں مرکز بݨدا پئے اتے حکومت بینک دی تجاویز تے غور کریسی۔ ایں توں پہلے ݙینھ دا آغاز وزیرِ خزانہ انٹرنیشنل فنانس کارپوریشن دے ریجنل نائب صدر ریکارڈو پولیتی نال ملاقات نال کیتا۔ وزیرِ خزانہ ایں موقع تے پاکستان دے مضبوط معاشی اشاریاں تے ڳالھ کیتی اتے نجی شعبے اچ سرمایہ کاری دے فروغ خاص طور تے 10 سالہ کنٹری پارٹنرشپ فریم ورک دے تحت ارباں ڈالر دی سرمایہ کاری تے آئی ایف سی دے کردار کوں سراہیا۔ ݙوہیں فریقین ریکوڈک منصوبے دے مالیاتی معاملے تیکھے طے کرݨ تے اتفاق کیتا۔ وزیرِ خزانہ اسلام آباد اچ آئی ایف سی دے نویں علاقائی دفتر دے قیام دا وی خیرمقدم کیتا۔ وزیرِ خزانہ اسلامی ترقیاتی بینک دے صدر ڈاکٹر محمد سلیمان الجاسر نال وی ملاقات کیتی۔ انہاں پاکستان کیتے بینک دی لمبے ویلھے دی امداد اتے تعاون تے شکریہ ادا کیتا اتے جاری منصوبیاں تے پیش رفت تکھی کرݨ دی لوڑھ تے زور ݙتا۔ وزیرِ خزانہ ایم۔6 موٹر وے دے ݙو حصیاں کیتے فنانسنگ دی منظوری تے اسلامی ترقیاتی بینک دے صدر دا شکریہ ادا کیتا اتے پولیو دے خاتمے اتے تیل فنانسنگ سہولت دے شعبیاں اچ تعاون جاری رکھݨ دی امید ظاہر کیتی۔ فریقین پاکستان کیتے نویں کنٹری انگیجمنٹ فریم ورک دی تیاری تے اتفاق کیتا۔