پاک سعودیہ تزویراتی شراکت داری خوش آئند، برادر ملک ایم 6 موٹروے، ایم ایل ون، سکل ڈویلپمنٹ اتے انفارمیشن ٹیکنالوجی دے بنیادی ڈھانچے دے منصوبیاں اچ وی شمولیت کرے، وزیر خزانہ محمد اورنگزیب

اسلام آباد۔15اکتوبر (اے پی پی) وفاقی وزیر خزانہ تے محصولات سینیٹر محمد اورنگزیب پاکستان اتے سعودی عرب وچال تزویراتی شراکت داری کوں سراہندے ہوئیں ایم 6 موٹروے، ایم ایل ون، سکل ڈویلپمنٹ اتے انفارمیشن ٹیکنالوجی دے بنیادی ڈھانچے دے منصوبیاں اچ سعودی عرب دی شمولیت دی لوڑھ تے زور ݙتے۔ انہاں اے ڳالھ گزریل ݙینھ واشنگٹن ڈی سی اچ عالمی بینک اتے بین الاقوامی مالیاتی فنڈ دے سالانہ اجلاساں دے موقع تے سعودی فنڈ برائے ترقی دے چیف ایگزیکٹو آفیسر سلطان عبدالرحمٰن المِرشَد نال ملاقات اچ آکھی۔ وزیر خزانہ پاکستان اتے سعودی عرب وچال سٹریٹجک شراکت داری کوں سراہیا اتے سعودی عرب ولوں تیل دی مُلوی ادائیگی دی سہولت تے شکریہ ادا کیتا، انہاں ٻئے تعاون کیتے حیدرآباد-سکھر موٹر وے (ایم 6)، ایم ایل ون، سکل ڈویلپمنٹ اتے آئی ٹی انفراسٹرکچر دے منصوبیاں اچ سعودی عرب دی شمولیت دی درخواست کیتی اتے ڈیجیٹل پاکستان ایجنڈا کیتے سعودی فنڈ دی حمایت کوں خوش آئند قرار ݙتا۔ وزیر خزانہ امریکی صدر دے معاون برائے بین الاقوامی معاشی امور ایموری کاکس، سینئر ڈائریکٹر برائے جنوبی و وسطی ایشیا ریکی گل اتے وائٹ ہاؤس کونسل آف اکنامک ایڈوائزرز دے قائم مقام چیئرپرسن پیری یارڈ نال تفصیلی ملاقات کیتی۔ انہاں جولائی اچ امریکی سیکرٹری تجارت ہاورڈ لُٹنک اتے یو ایس ٹی آر سفیر سارہ گریئر نال آپݨیاں ملاقاتاں دا حوالہ ݙیندیں ہوئیں آکھیا جو تجارت دے میدان اچ اُبھردے ہوئیں اتفاقِ رائے کوں جامع معاشی شراکت داری اچ بدلݨ دی لوڑھ اے۔ ملاقات اچ توانائی، معدنیات، زراعت، ٹیکنالوجی اتے ڈیجیٹل اثاثیاں دے شعبیاں اچ سرمایہ کاری دے امکانات بارے ڳالھ مہاڑ کیتی ڳئی۔ وزیرِ خزانہ پاکستان اچ مون سُون دی بارشاں دے باعث سیلاب نال تھیوݨ آلے نقصانات تے امریکا ولوں اظہارِ ہمدردی تے شکریہ وی ادا کیتا۔ بین الاقوامی مالیاتی فنڈ دے ڈپٹی منیجنگ ڈائریکٹر نائیجل کلارک نال ملاقات اچ وزیرِ خزانہ پروگرام دے تحت پاکستان دی کارکردگی کوں سراہݨ تے شکریہ ادا کیتا اتے ایں عزم دا اعادہ کیتا جو حکومت استحکام اتے اصلاحات دے جاری عمل کوں برقرار رکھیسی۔ انہاں توسیعی فنڈ سہولت اتے ریزیلیئنس اینڈ سسٹین ایبلٹی ٹرسٹ دے تحت معاونت تے آئی ایم ایف دا شکریہ ادا کیتا۔ گروپ 24 دے وزرائے خزانہ اتے گورنرز دے اجلاس نال خطاب اچ وزیرِ خزانہ پاکستان اچ کلی معیشت دے استحکام اچ تھیوݨ آلی پیش رفت تے روشنی پاتی اتے آکھیا جو ٹیکس، توانائی اتے سرکاری اداریاں اچ ڈھانچہ جات نال اے کامیابیاں حاصل تھین۔ انہاں علاقائی تجارتی راہداریاں اتے موسمیاتی تبدیلی دے چیلنجز نال نبڑݨ کیتے عالمی تعاون دی لوڑھ تے وی زور ݙتا۔ جیفریز انٹرنیشنل ولوں منعقدہ سرمایہ کاراں دے اجلاس اچ وزیرِ خزانہ شرکاء کوں پاکستان دی معاشی صورتحال، مالی و زری پالیسیاں، بیرونی شعبے دی حرکیات اتے آئی ایم ایف دے نال جاری شراکت تے بریفنگ ݙتی۔ انہاں ٹیکس اصلاحات، توانائی دے شعبے اچ اصلاحات، نجکاری دے منصوبیاں اتے برآمدات اچ وادھے کیتے حکومتی ٹیرف پالیسی تے روشنی پاتی۔ اجلاس دے چھیکڑ اچ سرمایہ کاراں دے نال سوال و جواب دا سیشن وی تھیا۔ عالمی بینک دے نائب صدر برائے مشرقِ وسطیٰ، شمالی افریقا، افغانستان و پاکستان عثمان دیون نال ملاقات اچ سینیٹر محمد اورنگزیب نویں کنٹری پارٹنرشپ فریم ورک دے موثر نفاذ کیتے حکومتِ پاکستان دے عزم کوں ولا دُہرایا۔ انہاں ݙسیا جو ایں کیتے ہک جامع عملدرآمدی منصوبہ تیار کیتا ڳئے جئیں اچ صوبائی حکومتاں دی مکمل مشاورت شامل اے۔ وزیر خزانہ پاکستان دی موسمیاتی لچک کوں مضبوط بݨاوݨ کیتے لمبے ویلھے دے فلڈ مِٹیگیشن پروگرام کیتے معاونت دی درخواست وی کیتی۔ مشرق بینک دے گروپ سی ای او احمد عبدالعال اتے اعلیٰ انتظامیہ نال ملاقات اچ وزیرِ خزانہ پاکستان اتے ایں عالمی شہرت یافتہ مالیاتی ادارے دے دیرینہ تعلقات کوں سراہیا۔ انہاں بینک دے پاکستان اچ باقاعدہ تجارتی آغاز تے انتظامیہ کوں مبارکباد ݙتی اتے یقین ظاہر کیتا جو مشرق بینک دی آمد نال مالیاتی نظام اچ جدت گھن آوݨ اتے سرمایہ کاری دے موقع ودھاوݨ اچ مدد مِلسی۔ وزیرِ خزانہ عالمی بینک ولوں مشین ایگری کنیکٹ فارمز، فرمز اینڈ فنانس فار جابز ڈائیلاگ اچ وی شرکت کیتی جِتھاں انہاں پاکستان دی معیشت اچ زراعت دے مرکزی کردار کوں اُجاگر کیتا۔ انہاں خریداری اتے قیمتاں دے حکومتی کنٹرول اچ ڳھٹکی دی سفارش کیتی اتے کاشتکاراں کیتے رعایتی قرضیاں، فسٹ لاس گارنٹیز اتے بغیر ضمانت فنانسنگ سویں اقدامات تے زور ݙتا۔ انہاں کولڈ چین، ویئرہاؤسنگ اتے ہارٹیکلچر ویلیو ایڈیشن اچ نجی شعبے دی سرمایہ کاری ودھاوݨ دی لوڑھ تے وی زور ݙتا۔ وزیرِ خزانہ عالمی بینک دے 10 سالہ کنٹری پارٹنرشپ فریم ورک اچ موسمیاتی لچک اتے کاربن اچ کمی تے توجہ کوں سراہندے ہوئیں صدر اجے بنگا دی ایں تجویز دی تائید کیتی جو کامیاب ماڈلز توں سِبق حاصل کیتا ونڄے۔