وفاقی وزیر خزانہ محمد اورنگزیب دی واشنگٹن ڈی سی اچ اہم ملاقاتاں تے خطاب، پاکستان دی کریڈٹ ریٹنگ اچ بہتری، کاروباری برادری دے اعتماد اچ نشابر ودھارے اتے سرمایہ کاری دے موقعیاں دا ݙسیا

اسلام آباد۔16اکتوبر (اے پی پی) وفاقی وزیر خزانہ تے محصولات سینیٹر محمد اورنگزیب امریکی دارالحکومت واشنگٹن ڈی سی اچ اہم ملاقاتاں اتے تقریباں توں خطاب کیتا جنہاں اچ انہاں پاکستان دی کریڈٹ ریٹنگ اچ بہتری، کاروباری برادری دے اعتماد اچ نمایاں ودھارے اتے سرمایہ کاری دے موقعیاں توں آگاہ کیتا۔ انہاں پاکستان اتے سعودی عرب وچال ودھدے ہوئیں تجارتی اتے سرمایہ کاری تعلقات کوں خوش آئند قرار ݙیندیں ہوئیں پاکستان اچ بنیادی ڈھانچے دے منصوبیاں اچ سعودی سرمایہ کاری دی خواہش دا اظہار کیتا اتے آکھیا جو موسمیاتی استحکام اتے بنیادی ڈھانچے دی ترقی کوں فروغ ݙیوݨ کیتے قرضیاں دے بہتر نظم و نسق، تکنیکی استعداد اچ ودھارے اتے پائیدار مالی وسائل تئیں پُہنچ ضروری اے۔ وفاقی وزیر خزانہ تے محصولات سینیٹر محمد اورنگزیب بین الاقوامی مالیاتی فنڈ اتے عالمی بنک دے سالانہ اجلاساں دے موقع تے واشنگٹن ڈی سی اچ سعودی ہم منصب محمد عبداللہ عبدالعزیز الجدعان نال اہم ملاقات کیتی۔ انہاں ایں موقع تے ݙوہیں ملکاں وچال ودھدے ہوئیں تجارتی تعلقات اتے سرمایہ کاری کوں اُجاگر کیتا۔ انہاں سعودی ہم منصب کوں قومی ائیر لائن پی آئی اے اتے ہوائی اڈیاں دی نجکاری تے پیش رفت توں آگاہ کیتا اتے پاکستان اچ نجی سرمایہ کاری دے فروغ تے ڳالھ مہاڑ کیتی۔ نجی سرمایہ کاری دے فروغ اچ بین الاقوامی مالیاتی کارپوریشن اتے ملٹی لیٹرل انویسٹمنٹ گارنٹی ایجنسی (میگا) دے اہم کردار تے وی ڳالھ مہاڑ تھئی۔ وزیر خزانہ محمد اورنگزیب پاکستان اچ بنیادی ڈھانچے دے منصوبیاں کیتے سعودی حمایت دی خواہش دا اظہار کیتا۔ وزیر خزانہ آئی ایم ایف پروگرام دے تحت اصلاحات دے ایجنڈے تے ثابت قدمی نال کَم کرݨ دا عزم ظاہر کیتا۔ وزیر خزانہ امریکی انٹرنیشنل ڈویلپمنٹ فنانس کارپوریشن دے سی ای او بینجمن بلیک نال ملاقات کیتی۔ ملاقات اچ امریکا دے نال سرمایہ کاری تعلقات ٻئے مضبوط بݨاوݨ تے ڳالھ تھئی۔ وزیر خزانہ پاکستان اچ تیل تے گیس، معدنیات، زراعت، آئی ٹی اتے دواسازی دے شعبیاں اچ سرمایہ کاری دے وݙے موقعیاں تے روشنی پاتی۔ انہاں آکھیا جو ݙوہیں ملکاں دی قیادت وچال تجارت اتے سرمایہ کاری دے فروغ تے اتفاقِ رائے اے۔ وزیر خزانہ ڈی ایف سی دی ولوں نجی شعبے دی قیادت اچ پاکستان اچ سرمایہ کاری دی دلچسپی دا خیر مقدم کیتا۔ وزیر خزانہ محمد اورنگزیب باروئرز فورم دے گول میز مذاکرے اچ شرکت کریندیں ہوئیں قرضیاں دی ادائیگیاں اتے سماجی شعبیاں اچ سرمایہ کاری وچال توازن دی اہمیت تے روشنی پاتی۔ انہاں فورم دے قیام کوں اجتماعی عمل، علم دے تبادلے اتے پالیسی ہم آہنگی کیتے ہک مثبت قدم قرار ݙتا۔ انہاں قرضیاں دے بہتر نظم و نسق، تکنیکی استعداد اچ ودھارے اتے پائیدار مالی وسائل تئیں پُہنچ دی لوڑھ تے زور ݙتا تاںجو موسمیاتی استحکام اتے بنیادی ڈھانچے دی ترقی کوں فروغ ݙتا ونڄ سڳے۔ وزیر خزانہ محمد اورنگزیب آذربائیجان دے نائب اول وزیر خزانہ انار کریموف نال وی ملاقات کیتی۔ ملاقات اچ انہاں ݙوہیں ملکاں وچال مضبوط معاشی اتے تزویراتی تعلقات تے اطمینان دا اظہار کیتا۔ وزیر خزانہ آذربائیجان کوں کوپ 29 دے کامیاب انعقاد تے مبارکباد ݙتی۔ انہاں پاکستان آذربائیجان ترجیحی تجارتی معاہدہ اتے ٹرانزٹ ٹریڈ معاہدہ کوں ݙو پاسہ تجارت کوں اڳو ودھاوݨ کیتے مضبوط پیش رفت قرار ݙتا، انہاں معاہدیاں نال تجارت کوں تیل اتے چاول سویں روایتی آئٹمز توں ٻیا اڳو ٹیکسٹائل، فارماسیوٹیکل، کیمیکل، مشینری اتے زرعی مصنوعات تئیں وسعت مِل سی۔ وزیر خزانہ پاکستان بنک فنڈ سٹاف ایسوسی ایشن دے اراکین نال وی ملاقات کیتی۔ وزیر خزانہ ایسوسی ایشن کوں پاکستان اچ مالیاتی، زری اتے بیرونی شعبیاں اچ حالیہ پیش رفت توں آگاہ کیتا۔ وزیر خزانہ ملٹی لیٹرل انویسٹمنٹ گارنٹی ایجنسی (میگا) دے ایگزیکٹو نائب صدر ہیروشی ماتانو نال ملاقات کیتی۔ انہاں جاری ثالثی معاملیاں اچ تعاون تے میگا دا شکریہ ادا کیتا اتے پاکستان ولوں سرمایہ کاراں دے اعتماد اتے قومی مفاد دے تحفظ دے عزم دا اعادہ کیتا۔ وزیر خزانہ سٹینڈرڈ چارٹرڈ بنک دی اعلیٰ انتظامیہ نال ملاقات کیتی اتے پاکستان اتے بنک دے دیرینہ شراکت داری تعلقات کوں سراہیا۔ سینیٹر اورنگزیب “کولیشن آف فنانس منسٹرز فار کلائمیٹ ایکشن” دے اجلاس اچ شرکت کیتی۔ انہاں مشہور برطانوی ماہرِ معیشت اسٹیفن ڈرکون نال وی ملاقات کیتی اتے وال سٹریٹ جرنل دے نال میڈیا انٹریکشن اچ حصہ گھیدا۔ ݙینھ بھر دیاں مصروف ملاقاتاں دے اختتام تے وزیر خزانہ سینیٹر محمد اورنگزیب واشنگٹن اچ پاکستان دے سفیر رضوان سعید شیخ ولوں پاکستان ہاؤس اچ ݙتے ڳئے عشائیے اچ ممتاز پاکستانی کاروباری شخصیات نال ملاقات کیتی۔