پاکستان دی اقتصادی ترقی دی شرح 3.5 توں گھن تے 4 فیصد تئیں رہݨ دا امکان اے، پاکستان موسمیاتی تبدیلیاں توں پیدا تھیوݨ آلے خطریاں دا سامݨا کریندا پئے، وفاقی وزیر خزانہ محمد اورنگزیب دا بلومبرگ کوں انٹرویو

اسلام آباد۔17اکتوبر (اے پی پی) وفاقی وزیر خزانہ تے محصولات سینیٹر محمد اورنگزیب آکھیا جو ایں مالی سال اچ پاکستان دی اقتصادی ترقی دی شرح 3.5 توں گھن تے 4 فیصد تئیں رہݨ دا امکان اے، پاکستان موسمیاتی تبدیلیاں توں پیدا تھیوݨ آلے خطریاں دا سامݨا کریندا پئے، ایں سال دے چھیکڑ تئیں پاکستان چینی کرنسی یوان اچ پانڈا بانڈ جاری کریسی۔ اے ڳالھ انہاں بلومبرگ کوں انٹرویو ݙیندیں ہوئیں آکھی۔ وفاقی وزیر خزانہ آکھیا جو پاکستان اچ مون سون دے دوران سیلاب نال زرعی شعبے کوں نقصان تھیے، سیلاب نال چاول اتے کاٹن دے شعبے کوں نقصان تھیے، ایں توں جی ڈی پی دی ودھارے تے اثر پئے سڳدے۔ وزیر خزانہ آکھیا جو سیلاب نال تھیوݨ آلے نقصانات دا تفصیلی جائزہ گھدا ویندا پئے، نقصان دا تفصیلی اندازہ آوݨ آلے مہینیاں اچ معلوم تھی ویسی۔ وزیر خزانہ آکھیا جو سیلاب نال اگرچہ جی ڈی پی دی شرح متاثر تھیسی تاں وی اساݙا اندازہ اے جو ایں سال دے دوران اقتصادی ترقی دی شرح 3.5 توں گھن تے 4 فیصد تئیں رہݨ دا امکان اے۔ وزیر خزانہ آکھیا جو موسمیاتی تبدیلی پاکستان کیتے حقیقی خطرہ اے، اساں ایںدا سامݨا کریندے پئیوں اتے حالیہ سیلاب نال ایںدی عکاسی وی تھیندی پئی اے۔ وزیر خزانہ آکھیا جو پاکستان بین الاقوامی کیپٹل مارکیٹس توں فائدہ گھن٘دا پئے۔ نومبر دے چھیکڑ یا دسمبر دے شروع اچ چینی کرنسی یوان اچ پہلا پانڈا بانڈ جاری تھیسی۔ انہاں آکھیا جو 250 ملین ڈالر دے ابتدائی بانڈز دے اجرا دا مقصد فنڈنگ دے ذریعیاں کوں مختلف بݨاوݨ اے۔ وزیر خزانہ آکھیا جو ایں توں پہلے پاکستان امریکی مارکیٹ، یورو بانڈ اتے اسلامی سکوک جاری کیتے ہن پر اساں ݙوجھی وݙی کیپٹل مارکیٹ توں ہݨ تئیں فائدہ نئی گھدا۔