ݙاہویں تھل جیپ ریلی 6 نومبر توں 9 نومبر تئیں جاری راہسی، اے ڈی سی جی مظفرگڑھ

مظفرگڑھ۔ 18 اکتوبر (اے پی پی) ڈپٹی کمشنر مظفرگڑھ عثمان طاہر جپہ دی زیرِ صدارت تھل جیپ ریلی دے انتظامات نال متعلق اہم اجلاس ڈپٹی کمشنر آفس مظفرگڑھ اچ تھیا۔ اجلاس اچ سارے متعلقہ محکمیاں دے افسراں شرکت کیتی۔ اجلاس اچ ݙاہویں تھل جیپ ریلی دے انتظامات دا تفصیلی جائزہ گھیدا ڳیا۔ فوکل پرسن ایڈیشنل ڈپٹی کمشنر ریونیو عوید ارشاد بھٹی ݙسایا جو تھل جیپ ریلی 6 توں 9 نومبر 2025 تئیں مظفرگڑھ، کوٹ ادو اتے لیہ دے صحراواں اچ تھیسی، جئیں اچ 100 توں ودھ قومی تے بین الاقوامی ریسرز شرکت کریسن۔ ریلی اچ 13 مختلف کیٹیگریز اچ مقابلے تھیسن جنہاں اچ ڈرٹ بائیک ریس وی شامل اے۔ ڈپٹی کمشنر عثمان طاہر جپہ متعلقہ محکمیاں کوں ہدایت کیتی جو سیکیورٹی، صفائی، ٹریفک مینجمنٹ اتے میڈیکل سہولتاں دے انتظامات کوں ویلھے سِر پورا کیتا ونجے۔ انہاں آکھیا جو تھل جیپ ریلی ایں خطے دی سنڄاݨ بݨ ڳئی اے۔ انہاں آکھیا جو ایں ایونٹ نال سیاحت کوں فروغ مِلسی اتے مقامی معیشت تے مثبت اثرات تھیسن۔