چیئرمین سینیٹ سید یوسف رضا گیلانی دی دیوالی دے موقع تے ہندو برادری کوں مبارخ

اسلام آباد۔20اکتوبر(اے پی پی)چیئرمین سینیٹ سید یوسف رضا گیلانی دیوالی دے موقع تے ملک سودھے پوری دنیا اچ وسݨ آلی ہندو برادری کوں دلوں مبارخ ݙتی اے۔ آپݨے پیغام اچ چیئرمین سینیٹ آکھیا جو دیوالی روشنی، امید، امن اتے نیکی دی فتح دا تہوار اے جو اساکوں اندھاریں دے خلاف روشنی، نفرت دے مقابلے اچ محبت، اتے ناانصافی دے خلاف انصاف دے قیام دا پیغام ݙیندے۔ انہاں آکھیا جو پاکستان ہک کثیرالثقافتی، کثیرالمذاہب اتے آپت دے احترام تے مبنی معاشرہ اے۔ انہاں آکھیا جو اقلیتاں پاکستان دے سماجی، تعلیمی، اقتصادی اتے ثقافتی سفر اچ اہم شریک ہن اتے انہاں دے حقوق دا تحفظ ریاست دی بنیادی ذمہ واری اے۔سید یوسف رضا گیلانی ایں موقع تے آکھیا جو اساکوں آپݨی سرزمین کوں او روشنی بݨاوݨا اے جو نفرت، تعصب اتے ونڈ دے اندھاریں کوں ختم کر ݙیوے، اسلام دا پیغام امن، محبت، عدل اتے انسانیت دی خدمت اے اتے ایہو پیغام سارے مذہب اچ سانجھیاں اقدار دے طور تے موجود اے۔ انہاں آکھیا جو ایہو آپت دا احترام اتے بھرپی پاکستان کوں ہک مضبوط ، مستحکم اتے پرامن ملک بݨاوݨ اچ کلیدی کردار ادا کریندے۔چیئرمین سینیٹ آکھیا جو پارلیمان پاکستان اچ بین المذاہب ہم آہنگی دے ودھارے، اقلیتاں دے حقوق دے تحفظ اتے قومی اتحاد دے ودھارے کیتے پُرعزم اے۔ انہاں آکھیا جو سینیٹ وفاق دی علامت اے اتے ایں ایوان دا بنیادی مقصد ملک دے سارے طبقیں اتے خطیں کوں ہک پلیٹ فارم تے کٹھا رکھݨا اے تاں جو پاکستان اچ انصاف، مساوات اتے بھرپی دا نظام تکڑا تھیوے۔ انہاں امید ظاہر کیتی جو اے تہوار پاکستان اچ وسݨ آلی ساریاں برادریاں وچال تعلقات کوں مزید مستحکم کریسی اتے ملک اچ رواداری و بھرپی دے جذبے کوں ودھارا ݙیسی۔