خیبر پختونخوا حکومت دہشت گردی دے خلاف مؤثر اقدامات کرݨ اچ ناکام ݙسدی پئی اے، طلال چوہدری

اسلام آباد۔21اکتوبر(اے پی پی) وزیرِ مملکت داخلہ طلال چوہدری آکھیے جو خیبر پختونخوا حکومت دہشت گردی دے خلاف مؤثر اقدامات کرݨ اچ ناکام ݙسدی پئی اے، آئینی طور تے خیبر پختونخوا اچ گورنر راج دا اختیار موجود اے پر وفاقی حکومت ایجھا اقدام نہ چیسی۔ میڈیا نال ڳالھ مہاڑ اچ انہاں آکھیا جو وفاقی حکومت خلوصِ نیت نال صوبائی پولیس کوں بلٹ پروف گاݙیاں ݙتیاں پر ایں معاملے کوں سیاسی رنگ ݙے ݙتا ڳئے۔ انہاں آکھیا جو کُجھ حلقے دہشت گردی دے خلاف بھرپور کارروائی کرݨ دے خلاف ہن۔ وزیرِ مملکت سہیل بزدار دے ناں دا حوالہ ݙیندے آکھیا جو انہاں کوں سوچ سمجھ تے تعینات کیتا ڳیا ہئی۔ انہاں آکھیا جو جے بلٹ پروف گاݙیاں قبول کائِنی تاں وزیراعلیٰ آپݨی ذاتی گاݙی پولیس دے حوالے کرݙیوے۔ طلال چوہدری مزید آکھیا جو آرٹیکل 148 دے تحت صوبائی حکومت فیصلیں اچ پوری طرح آزاد کائنی اتے دہشت گردی دے خلاف جنگ پورے ملک دی جنگ اے، ایں کیتے وزیراعلیٰ دی تبدیلی نال ایں جنگ اچ کوئی فرق نی آوݨ آلا۔ انہاں موجب وزیراعظم شہباز شریف دی ہدایت تے خیبر پختونخوا پولیس کوں جدید گاݙیاں ݙتیاں ڳئیاں اتے وفاقی حکومت مالی اوکھ دے باوجود امداد ݙیوݨ جاری رکھی جݙاں جو صوبائی حکومت دہشت گردی دے خلاف مؤثر اقدامات کرݨ اچ ناکام ݙسدی پئی اے۔ وزیرِ مملکت خبردار کیتا جو ایں “بچگانہ” فیصلے نال کہیں دی جان کوں خطرہ لاحق تھی سڳدے اتے جے کوئی جانی ضیان تھیا تاں ایں دے ذمہ وار متعلقہ حکام ہوسن، انہاں دے لفظاں اچ صوبائی حکومت پولیس دے جواناں کوں مؤثر تحفظ فراہم نی کیتا۔ طلال چوہدری آکھیا جو سعد رضوی دی اثاثہ جات دی تفتیش دے دوران 69 برانڈ دیاں گھڑیاں برآمد تھئن اتے انہاں دی قیادت دے زیرِ استعمال 100 اکاؤنٹس ہن جیں دے ذریعے بینکاں توں سُود دے مد اچ کروڑاں روپے حاصل کیتے ویندے پئن۔ انہاں آکھیا جو تحریکِ لبیک پاکستان (ٹی ایل پی) “انتہا پسندانہ سوچ” رکھݨ آلی جماعت اے۔ انہاں مزید آکھیا جو پاکستان انتشار اتے تشدد دی سیاست برداشت نی کر سڳدا اتے آئینی اجازت دے باوجود وفاقی حکومت گورنر راج لاگو نہ کریسی جݙاں جو صوبائی حکومت توں مطالبہ کیتا جو او آپݨے شہریاں دی جان و مال دے تحفظ کوں یقینی بݨاوے۔