ریکو ڈک سویں منصوبیاں اچ چین دی شمولیت نال ݙوہیں ملکاں وچال ودھدے ہوئے معاشی تعلقات دی عکاسی تھیندی پئی اے، سینیٹر محمد اورنگزیب

اسلام آباد۔24 اکتوبر (اے پی پی) وفاقی وزیر برائے خزانہ تے محصولات سینیٹر محمد اورنگزیب آکھیا جو پائیدار معاشی بحالی کوں یقینی بݨاوݨ کیتے حکومت ڈھانچہ جاتی اصلاحات، سرکاری اداریاں دی نجکاری تے نجی شعبے دی قیادت اچ ترقی و نمو تے اپݨی توجہ ݙتی اے، ریکو ڈک سویں منصوبیاں اچ چین دی شمولیت نال ݙوہیں ملکاں وچال ودھدے ہوئے معاشی تعلقات دی عکاسی تھیندی پئی اے۔ انہاں اے ڳالھ جمعے کوں اتھاں پاکستان اچ چین دے نویں تعینات تھیوݨ آلے ہائی کمشنر طارق علی خان نال ملاقات اچ آکھی۔ وزیرِ خزانہ ہائی کمشنر دا گرمجوشی نال استقبال کیتا تے اسلام آباد اچ ذمہ داریاں سنبھالݨ تے انہاں کوں مبارکباد ݙتی۔ وزیر خزانہ پاکستان دی اڄوکی معاشی کارکردگی تے اصلاحات دے ایجنڈے دا جائزہ پیش کریندیں ہوئیں آکھیا جو گزریل ترائے سال پہلے دے مشکل دور دے بعد ملک دے مجموعی معاشی اشاریاں اچ نمایاں بہتری آئی اے، مہنگائی تے قابو پا گھدا گئے اتے مالی نظم و ضبط بحال تھی ڳئے۔ انہاں آکھیا جو پائیدار معاشی بحالی کوں یقینی بݨاوݨ کیتے حکومت ڈھانچہ جاتی اصلاحات، سرکاری اداریاں دی نجکاری تے نجی شعبے دی قیادت اچ ترقی و نمو تے توجہ مرکوز کیتی ہوئی اے۔ وزیر خزانہ ہائی کمشنر کوں پاکستان دے بین الاقوامی مالیاتی اداریاں تے ترقیاتی شراکت داراں نال رابطے تے شمولیت بارے وی ݙسایا جو حکومت بالخصوص توانائی، بنیادی ڈھانچے تے معدنیات دے شعبیاں اچ غیر ملکی سرمایہ کاری دے فروغ کوں اولین ترجیح ݙیندی پئی اے، چین دے ہائی کمشنر ایں ڳالھ تے زور ݙتا جو زرعی تجارت تے کاروباری روابط کوں فروغ ݙیوݨ کیتے ݙوہیں ملکاں اچ وسیع امکانات موجود ہن جنہاں اچ مجوزہ “چین-پاکستان چیمبر آف کامرس” دے قیام دا امکان وی شامل اے۔ انہاں موسمیاتی مالیات کیتے چین دے عزم تے کثیرالجہتی ماحولیاتی فنڈز اچ انہاں دی مسلسل شراکت دی تصدیق کیتی۔