ملکی معیشت سیلاب دے اوکھ دے باوجود بحالی دا سفر جاری رکھیے، اکتوبر 2025 اچ افراطِ زر دی شرح 5 توں 6 فیصد تئیں رہݨ دا امکان اے، وفاقی وزارت خزانہ

اسلام آباد۔ 27 اکتوبر(اے پی پی)وفاقی وزارت خزانہ آکھیے جو ملکی معیشت سیلاب توں پیدا تھیوݨ آلے اوکھ اتے رُکاوٹاں دے باوجود بحالی دے آپݨے سفر کوں برقرار رکھیے، اکتوبر 2025 اچ افراط زر دی شرح 5 توں 6 فیصد تئیں رہݨ دا امکان اے۔ اے ڳالھ وزارت خزانہ ولوں جاری ماہانہ اقتصادی اپ ڈیٹ رپورٹ اچ ݙسائی ڳئی اے۔ رپورٹ دے مطابق صنعتی سرگرمیاں اچ بہتری آندی پئی اے، وݙیاں صنعتاں خصوصاً سیمنٹ، آٹو موبائل اتے ٻئے متعلقہ شعبیاں بحالی دے عمل کوں سہارا ݙتے جݙاں جو برآمدات اتے ترسیلاتِ زر اچ وی بتدریج بہتری آوݨ لڳ ڳئی اے۔ رپورٹ دے مطابق بیرونی شعبہ مستحکم اے اتے ستمبر 2025 اچ حساباتِ جاریہ دے کھاتیاں دا توازن فاضل ریکارڈ تھئے جیندی وجہ مضبوط ترسیلاتِ زر آوݨ اے، افراطِ زر وقتی طور تے غذائی اشیاء دی فراہمی اچ دباؤ پاروں متاثر تھئی اے ٻھل امکان اے جو افراط زر ایں مقررہ ہدف دے اندرو ھی رہسی۔ رپورٹ دے مطابق بین الاقوامی مالیا‏تی فنڈ دی توسیع فنڈ سہولت اتے ریزیلینس اینڈ سسٹین ایبلیٹی سہولت دے تحت مجموعی جائزے پاکستان اچ اصلاحات دے رخ اتے دانشمندانہ معاشی نظم و نسق تے اعتماد ودھائے، کریڈٹ ریٹنگ دے حوالے نال عالمی اداریاں فچ، ایس اینڈ پی اتے موڈیز ولوں پاکستان دی ریٹنگ اچ بہتری توں معاشی رخ اتے پالیسیاں تے بین الاقوامی اعتماد دی عکاسی تھیندی اے۔ رپورٹ دے مطابق نجکاری دے عمل، ڈیجیٹل گورننس اتے سی پیک فیز 2.0 دے مشترکہ منصوبیاں اچ مسلسل پیش رفت حکومت دا اے عزم ݙسیندی اے جو او مالی نظم و ضبط، ڈھانچہ جاتی اصلاحات اتے پائیدار و شمولیت معاشی ترقی کیتے پرعزم اے۔ رپورٹ دے مطابق سیلاب توں متاثر سپلائی چین اچ رُکاوتاں اتے سرحداں دی وقتی بندش کڄھ بنیادی اشیاء دی قیمتاں تے دباؤ پاتے ٻھل توقع اے جو اکتوبر 2025 اچ افراط زر دی شرح 5 توں 6 فیصد دے درمیان رہیسی۔ رپورٹ دے مطابق جاری مالی سال دی پہلی سہ ماہی اچ سمندر پار پاکستانیاں دی ترسیلاتِ زر دا حجم 9.536 ارب ڈالر ریکارڈ تھیا جیہڑا پچھلے مالی سال دی ایں مدت دے 8.796 ارب ڈالر دے مقابلے اچ 8.4 فیصد ودھ اے۔ پہلی سہ ماہی اچ برآمدات اچ سالانہ بنیاداں تے 6.5 فیصد اتے درآمدات اچ 8.3 فیصد دی نمو تھئی، ایں مدت اچ برآمدات دا حجم 7.9 ارب ڈالر اتے درآمدات دا حجم 15.4 ارب ڈالر ریکارڈ تھیا جیہڑا پچھلے مالی سال دی ایں مدت اچ باالترتیب 7.4 اتے 14.3 ارب ڈالر ہا، حسابات جاریہ دے کھاتیاں اچ 594 ملین ڈالر دا فاضل ریکارڈ تھیا جیہڑا پچھلے مالی سال دی ایں مدت اچ 502 ملین ڈالر ہا ٻھل ستمبر اچ حسابات جاریہ دے کھاتیاں دا توازن 110 ملین ڈالر فاضل ریکارڈ تھیا۔ پہلی سہ ماہی اچ براہ راست بیرونی سرمایہ کاری دا حجم 568.8 ملین ڈالر ریکارڈ تھیا جیہڑا پچھلے مالی سال دی ایں مدت دے 864.6 ملین ڈالر دے مقابلے اچ 34.2 فیصد گھٹ اے۔ 17 اکتوبر 2025 کوں زرمبادلہ دے ملکی ذخائر دا حجم 19.9 ارب ڈالر ریکارڈ تھیا جیہڑا پچھلے سال 18 اکتوبر کوں 16 ارب ڈالر ہا، 24 اکتوبر 2025 کوں ایکسچینج ریٹ 281 روپے ریکارڈ تھیا، پچھلے سال 24 اکتوبر کوں ایکسچینج ریٹ 277.7 روپے ریکارڈ تھیا ہا۔ وزارت خزانہ دے مطابق مالی سال دے پہلے ݙو مہینے اچ ایف بی آر دی محصولات دا حجم 2.884 ٹریلین روپے رہیا جیہڑا پچھلے سال دی ایں مدت دے 2.562 ٹریلین روپے دے مقابلے اچ 12.5 فیصد ودھ اے۔ نان ٹیکس محصولات دا حجم 2.804 ٹرین روپے رہیا جیہڑا پچھلے سال دی ایں مدت دے 341.5 ارب روپے دے مقابلے اچ 721 فیصد ودھ اے۔ مالی سال دے پہلے ݙو مہینے اچ مالی خسارے دا حجم 2.123 ٹریلین روپے رہیا جیہڑا پچھلے مالی سال دی ایں مدت اچ 841.4 ارب روپے فاضل ہا، ستمبر اچ پالیسی ریٹ 11 فیصد تھیا جیہڑا پچھلے سال ستمبر اچ 17.5 فیصد ہا، ستمبر اچ مہانگائی دی شرح 4.2 فیصد ریکارڈ کیتی ڳئی جیہڑی پچھلے سال ستمبر اچ 9.2 فیصد ہئی، وݙیاں صنعتاں دی پیداوار اچ نمو دی شرح 4.44 فیصد ریکارڈ کیتی گئی۔ 24 اکتوبر 2025 کوں پاکستان سٹاک ایکسچینج دا 100 انڈیکس 163304 پوائنٹس ریکارڈ تھیا جیہڑا پچھلے سال 24 اکتوبر کوں 88944 پوائنٹس ہا، 24 اکتوبر کوں مارکیٹ کیپٹلائزیشن دا حجم 66.90 ارب ڈالر ریکارڈ تھیا جیہڑا پچھلے سال 24 اکتوبر کوں 41.77 ارب ڈالر ہا، مارکیٹ کیپٹلائزیشن اچ مجموعی طور تے 60.2 فیصد دی نمو ریکارڈ کیتی گئی اے۔ نویاں کمپنیاں دی رجسٹریشن دی شرح اچ 33.4 فیصد دی نمو تھئی اے۔