مظفرگڑھ، ݙاہویں تھل جیپ ریلی دے موقع تے کوٹ ادو اچ ݙو ݙیہاڑی فیملی فن گالا کیتا ویسی، اسسٹنٹ کمشنر

مظفرگڑھ۔ 31 اکتوبر (اے پی پی) کوٹ ادو دی تاریخ اچ پہلی واری ضلعی انتظامیہ ولوں جنوبی پنجاب دے سب توں وڈے میگا ایونٹ ݙاہویں تھل جیپ ریلی کوں یادگار بݨاوݨ کیتے نینڳراں اتے تریمتاں کیتے میونسپل اسٹیڈیم اچ ݙو ݙیہاڑی (6/7 نومبر) فیملی فن گالا کیتا ویسی، سیکیورٹی دے پکے انتظامات کیتے ڳئن۔ پروگرام دے فوکل پرسن اسسٹنٹ کمشنر کوٹ ادو رومان خلیل ݙسیا جو کمشنر ڈیری غازی خان ڈویژن اتے ڈپٹی کمشنر کوٹ ادو دی ہدایت تے ݙاہویں تھل جیپ ریلی کوں یادگار بݨاوݨ کیتے ݙو ݙیہاڑی فیملی فن گالا دا انعقاد کیتا ویندا پئے، جیندے اچ کھاݨے، کاروبار، دستکاری وغیرہ دے سٹال لاتے ویسن، میجک شو اتے میوزک دے پروگرام ہوسن۔ انہاں آکھیا جو شہری آپݨی فیملیز دے نال ایں تاریخی ایونٹ اچ پورا حصہ گھنن اتے ایں پروگرام کوں کامیاب بݨاون۔ ایونٹ دے خاص مہمان کمشنر ݙی جی خان ہوسن۔ یاد راہوے جو مظفرگڑھ، کوٹ ادو اتے لیہ دے صحراواں اچ 6 نومبر توں جنوبی پنجاب دے سب توں وڈے اسپورٹس ایونٹ ݙاہویں تھل جیپ ریلی تھیندی پئی اے، جیندے اچ 100 توں ودھ ناں آلے ریسر حصہ گھنسن۔