بھارتی ریاست آندھرا پردیش دے مندر اچ بھگدڑ نال 10 بندے ہلاک، کئی زخمی

نویں دہلی۔ 1 نومبر (اے پی پی) بھارتی ریاست آندھرا پردیش دے مندر اچ بھگدڑ نال 10 بندے ہلاک اَتے کئی زخمی تھی ڳئے۔ شنہوا دے مطابق پولیس حکام ݙسیا جو اے حادثہ سری کاکولم ضلعے دے کاسی بُگگا علاقے اچ واقع ونکٹیشورا سوامی مندر اچ تھیا، جیہڑا آندھرا پردیش دے دارالحکومت امراؤتی توں تقریباً 548 کلومیٹر اُتر مشرق اچ واقع اے۔ واقعہ اُوں ویلھے تھیا جݙاں اکادشی دے موقع تے وݙی تعداد اچ عقیدت مند مندر اچ جمع ہَن۔ مقامی رپورٹس دے مطابق مندر اچ آوݨ آلے یاتریاں دی گݨتی اندازے توں بہوں ودھ ہئی، اَتے انتظامیہ رش کوں چنڳے طریقے نال سنبھالݨ اچ ناکام رہی، جئیں پاروں بھگدڑ مچ ڳئی۔ جئیں نال 10 بندے ہلاک اَتے کئی زخمی تھی ڳئے جنہاں کوں نیڑے دے ہسپتال منتقل کر ݙتا ڳئے۔ پولیس حکام ہلاکتاں اچ ودھارے دا خدشہ ظاہر کیتے۔