محکمہ سیاحت پنجاب اَتے ضلعی انتظامیہ مظفرگڑھ ولوں ݙاہویں تھل جیپ ریلی دی تیاریاں مکمل

مظفرگڑھ۔ 6 نومبر (اے پی پی) محکمہ سیاحت پنجاب اَتے ضلعی انتظامیہ مظفرگڑھ ولوں ݙاہویں تھل جیپ ریلی دی تیاریاں مکمل کر ڳھدی ڳئِن۔ 4 ݙینہہ دی اے تھل جیپ ریلی اڄ 6 نومبر توں شروع تھیسی، جݙاں جو 9 نومبر کوں مظفرگڑھ دے فیصل اسٹیڈیم اچ انعام ونݙݨ دی تقریب تھیسی۔ تھل جیپ ریلی مظفرگڑھ، کوٹ ادو اَتے لیہ دے صحراواں اچ تھیسی جِتھ ملکی اَتے غیر ملکی ریسرز آپݨے ہُنر ݙکھیسن۔ جاری کیتے ڳئے شیݙول دے مطابق 6 نومبر سویلے 9 وجے توں 3 وجے تئیں رجسٹریشن، ٹیکنگ، ٹیکنیکل معائنہ (انسپکشن) اَتے میڈیکل معائنہ دا عمل مکمل تھیسی۔ 7 نومبر کوں ہیڈ محمد والا چھانگا مانگا ٹیلہ تے کوالیفائنگ راؤنڈ تھیسی۔ 8 نومبر کوں سٹاک کیٹگری ریس، 9 کوں موڈیفائیڈ ڳاݙی اَتے تریمتیں دی کیٹیگری دے مقابلے اَتے رات کوں فیصل اسٹیڈیم اچ انعام ونݙݨ دی تقریب تھیسی۔ ݙاہویں تھل جیپ ریلی کیتے پولیس وَلّوں سیکیورٹی دے انتظام وی مکمل کر ڳھدے ڳئِن، پولیس ترجمان دے مطابق 400 توں ودھ پولیس اہلکار تھل جیپ ریلی دے موقع تے سیکیورٹی ݙیوٹی ݙیسن، 3 ݙی ایس پیز اَتے 11 انسپکٹرز وی فرائض سرانجام ݙیسن۔ ٹریفک پولیس وَلّوں وی ہک منظم نظام بݨایا ڳئے۔ ݙی پی او سید غضنفر علی شاہ آکھیا جو ریلی دے سارے ایونٹس اچ بھرپور سیکیورٹی ݙتی ویسی، اَتے تھل جیپ ریلی کوں پرسکون تفریحی پروگرام بݨایا ویسی۔