پاکستان اتے سری لنکا دی کرکٹ ٹیماں وچال ترائے ون ڈے انٹرنیشنل میچاں دی سیریز کل شروع تھیسی

راولپنڈی۔10نومبر (اے پی پی) پاکستان اتے سری لنکا دی کرکٹ ٹیماں وچال ترائے ون ڈے انٹرنیشنل میچاں دی سیریز دا آغاز (کل) منگل کوں راولپنڈی کرکٹ اسٹیڈیم اچ پہلے میچ نال تھیسی۔ قومی ٹیم دی اڳواݨی فاسٹ باؤلر شاہین شاہ آفریدی کریسن جڈاں جو سری لنکن ٹیم دی کمان چریتھ اسالنکا دے حوالے کیتی گئی اے۔ میچ مقامی ویلھے موجب ݙو پہر اݙھائی وڄے شروع تھیسی۔ پاکستان ٹیم ایں توں پہلے جنوبی افریقہ دے خلاف ترائے ون ڈے میچاں دی سیریز 1-2 نال جتی اے جئیں دے بعد قومی کھڈاریاں دا مورال اُچا اے۔ سیریز دا ݙوجھا میچ 13 نومبر جڈاں جو تریجھا اتے چھیکڑی میچ 15 نومبر کوں کھیݙیا ویسی۔ ترائے میچز راولپنڈی کرکٹ اسٹیڈیم اچ تھیسن۔ میچز دے دوران سیکیورٹی اتے ٹریفک دی چنگی نگرانی کیتے راولپنڈی پولیس مکمل انتظامات پورے کر ڳھدن۔ ترجمان راولپنڈی پولیس دے مطابق 5500 توں ودھ پولیس افسران تے اہلکار سیکیورٹی ڈیوٹی تے لگے ہن جڈاں جو 350 توں ودھ ٹریفک وارڈنز شہریاں دی سہولت اتے ٹریفک دی روانی برقرار رکھݨ کیتے تعینات ہن۔ اسٹیڈیم دے آسے پاسےاتے اُچی عمارتاں تے سنائپرز کوں لاتا گئے تاںجو کہیں وی ہنگامی صورتحال نال ویلھے تے نبڑیا ونجے۔ سیکیورٹی مانیٹرنگ کیتے جدید سی سی ٹی وی کیمریاں تے مشتمل خصوصی کنٹرول روم قائم کیتا گئے۔ تھاݨیاں دی موبائلز، ایلیٹ فورس اتے ڈولفن اسکواڈ اسٹیڈیم دے گرد گشت کریندے پئن تاںجو سیکیورٹی دے سارے پہلوواں کوں یقینی بݨایا ونجے۔ شہریاں دی سہولت کیتے چنگا ٹریفک پلان بݨایا گئے جڈاں جو متبادل رستیاں دی رہنمائی کیتے اضافی عملہ وی لاتا گئے۔