پاکستان، سری لنکا اتے زمبابوے دیاں کرکٹ ٹیماں وچال 3 ملکی ٹی 20 سیریز (کل) منگل توں راولپنڈی ا شروع تھیسی

راولپنڈی۔17نومبر(اے پی پی) پاکستان، سری لنکا اتے زمبابوے دیاں کرکٹ ٹیماں وچال 3 ملکی ٹی 20 سیریز (کل) منگل توں راولپنڈی اچ شروع تھیسی۔ سیریز دا افتتاحی میچ پاکستان اتے زمبابوے وچال تھیسی جݙاں جو سارے مقابلے راولپنڈی کرکٹ اسٹیڈیم اچ کھیݙے ویسن۔ پاکستان ٹیم دے کپتان سلمان علی آغا سیریز کوں ہک ویلھے تے چیلنج قرار ݙیندے آکھیے جو مسلسل مضبوط ٹیماں دے خلاف کرکٹ کھیݙݨ نال قومی سکواڈ کوں اپݨی منصوبہ بندی ٻئی چنڳی بݨاوݨ اچ مدد مِلسی۔ انہاں آکھیا جو گزریل مہینیاں اچ پاکستان شاندار کارکردگی ݙکھائی اے، شارجہ اچ سہ ملکی سیریز جیتی، ایشیا کپ دے فائنل اچ جاء بݨائی اتے جنوبی افریقہ و سری لنکا دے خلاف وائٹ بال سیریز اچ وݙیاں کامیابیاں حاصل کیتن۔ اساں ایں تسلسل کوں ایں سیریز اچ وی برقرار رکھݨ کیتے پرامید ہیں۔ پاکستان دے سکواڈ اچ سلمان علی آغا (کپتان)، فخر زمان، صائم ایوب، بابر اعظم، صاحبزادہ فرحان، عثمان خان، عبدالصمد، فہیم اشرف، محمد نواز، ابرار احمد، وسیم جونیئر، شاہین شاہ آفریدی، نسیم شاہ، سلمان مرزا اتے عثمان طارق شامل ہن۔