صدارتی ایوارڈ یافتہ سرائیکی ادب دے مہاندرے، سابق اسٹیشن ڈائریکٹر ریڈیو پاکستان ڈاکٹر نصر اللہ خان ناصر کوں دفنا ڈتا گئے۔

اسلام آباد۔25نومبر (اے پی پی)صدارتی ایوارڈ یافتہ سرائیکی ادب دے مہاندرے، سابق اسٹیشن ڈائریکٹر ریڈیو پاکستان ڈاکٹر نصر اللہ خان ناصر کوں دفنا ڈتا گئے۔ خدادا صلاحیتاں دے مالک معروف شاعر، ادیب ، دانشور تے سابق اسٹیشن ڈائریکٹر ریڈیو پاکستان ڈاکٹر نصر اللہ خان ناصر تحصیل لیاقت پور (ضلع رحیم یار خان) دے قصبہ عظیم پور دی مشہور وستی  چاکر خان گورگیج اچ  03 فروری 1946ء کوں سردار گل مُحَمَّد خان گورگیج دے گھر ڄمیے۔ لیاقت پور ادبی فورم پاکستان دے جنرل سیکرٹری طارق ملک “اے پی پی سرائیکی نیوز سروس” نال گالھ مہاڑ کریندے آکھیے جو اے اوہو گورگیج قبیلہ اے جیندے چیف سردار مُحَمَّد نصیر خان گورگیج سابق ریاست بہاول پور اچ وزیر اعظم دے عہدے تے ریہن۔  طارق ملک آکھیے جو ڈاکٹر نصر اللہ خان ناصر منڈھلی تعلیم تحصیل لیاقت پور دے تعلیمی ادارے گورنمنٹ بوائز پرائمری سکول وستی چاکر خان گورگیج توں گھدی تے بعد اچ او اللہ آباد آڳئے اتے گورنمنٹ ہائی سکول اللہ آباد توں ڈاہویں دا امتحان پاس کیتا ۔ گورنمنٹ ایس ای(صادق ایجرٹن) کالج بہاول پور توں گریجوایشن دے بعد گورنمنٹ ایمرسن کالج ملتان توں ایم اے دی ڈگری گھدی۔ ڈاکٹر نصر اللہ خان ناصر 1975ء اچ ریڈیو پاکستان اچ پروگرام پروڈیوسر دے طور تے آپدی خدمت دا منڈھ ٻدھا اتے 03 فروری 2006ء کوں 60 سال دی عمر اچ اسٹیشن ڈائریکٹر دے عہدے توں ریٹائر تھئے۔ ڈاکٹر نصر اللہ خان ناصر ریٹائرمنٹ دے بعد اسلامیہ یونیورسٹی بہاول پور دے شعبہ سرائیکی دے چیئرمین دی حیثیت اچ خدمت کیتی جڈاں جو او یونیورسٹی کالج آف آرٹ اینڈ ڈیزائن بہاول پور دے پرنسپل دے عہدے تے شاندار کم کیتے ۔ڈاکٹر نصر اللہ خان ناصر  1994ء اچ بہاؤ الدین زکریا یونیورسٹی ملتان توں سرائیکی زبان اچ  ” سرائیکی شاعری دا ارتقاء ” دے عنوان نال پی ایچ ڈی دا مقالہ لکھ تے پہلے سرائیکی پی ایچ ڈی ہوونڑ دا اعزاز گھدا انھاں دے تحقیقی مقالے اچ ایک ہزار سالہ سرائیکی شعری ادب دے مختلف ادوار دا تعین کیتا گیا اے۔ جیندے نال سرائیکی ادب دی قدامت  دا اندازہ لایا ونج سگدے ۔ اسلامیہ یونیورسٹی بہاولپور دے ایم اے سرائیکی دے اسٹوڈنٹس ” سرائیکی شاعری دا ارتقاء ” توں فیدہ چیندن جیندے نگران ڈاکٹر مہر عبدالحق ہن ۔ لیاقت پور ادبی فورم پاکستان دے جنرل سیکرٹری طارق ملک ڈاکٹر نصر اللہ خان ناصر دیاں لکھتاں بارے ڈسیندن جو انہاں مقالہ”سرائیکی شاعری دا ارتقاءْ لکھیا اتے انہاں دی شاعری اتے کھتاں اچ ، اجرک،یہ کیسا دکھ ہے، نویں سوبھ، معنویت اتے تشخص  چھپ چکئین جڈاں جو “صحرا دے گاوݨ، وادی سندھ دیاں چولستانی خانہ بدوش قبائل دے پراݨے گاونڑ وی شامل ہین۔

جدید سرائیکی شاعری تے انھاں دا  سرائیکی شعری مجموعہ ” اجرک ” شائع تھیا۔ اکادمی ادبیات پاکستان ایکوں ” خواجہ فرید ایوارڈ ” نال نوازا جڈاں جو اسلامیہ یونیورسٹی بہاول پور  ” اجرک ” کوں ایم اے سرائیکی دے نصاب دا حصہ ٻݨایا۔  حکومت پاکستان ڈاکٹر نصر اللہ خان ناصر دی علمی تے ادبی خدمات دے اعتراف اچ انھاں کوں ” صدارتی ایوارڈ برائے حُسنِ کارکردگی ” 23 مارچ 2024ء کوں یومِ پاکستان دے موقعے تے ڈتا گئے ۔  ڈاکٹر ناصر اللہ خان ناصر ہک باکمال ادیب ، دانشور اتے جدید سرائیکی شاعری دے مہان شاعر ہن جیڑھے 24 نومبر 2025ء سنوار دے ڈینھ 79 سال دی عمر اچ  تھوڑے ڈینھ بیمار رہوݨ دے بعد بہاول وکٹوریہ ہسپتال اچ ساہ ݙے ݙتا ۔ مرحوم دی جنازہ آج 25 نومبر منگل کوں 11 وجے ݙینھ کینال کالونی بہاول پور اچ پڑھائی گئی۔ مرحوم دیاں تخلیق کردہ ݙو سرائیکی نظماں اے ہن

میڈے سارے لفظ ہن ترکہ

اجرک دیس وسیب دا

میڈے گل وچ ڈھولے پٹڑیاں

کنیں پیت دیاں مُرکھیاں

گل عشق وفا دیاں گانیاں

چننْ پیر دے میلے ونجاں

جنجوں بھر کچاوے

وجدیں واجیں چھنْے ڈیواں

منوتیاں اٹے گھٹے

____

میں ہک لفظ نی کھسکیا

اج تئیں

اوچ شہر دے مقبرے سارے

بی بی جند وڈی دا روضہ

سلھ سلھ تھی تے

ڈھاندے ویندن

پتن منارا جینکوں صدیاں

نو نو سو سلامیاں ڈیون

کردا ویندے

میکوں فکر اے

میڈے بالیں

میں تو میڈا

شجرہ پچھیا تاں میں

کیا اکھیساں

 

ڈاکٹر نصراللہ خان ناصر دی ہک آزاد اردو نظم ۔

جدا ہونے کا موسم آ گیا ہے

اداسی چار سو بینر لگاتی پھر رہی ہے

” الوداعی ” کے

دکھوں نے شہر کے سب راستوں پر

بچھڑ جانے کے نوحے لکھ دیے ہیں

ہزاروں خواب رخصت ہو رہے ہیں

کوئی پیمان

آنسو بن کے آنکھوں میں

کسی دلدار لہجے کو ترستا ہے

خدا جانے مسافر کب پلٹتا ہے

(ڈاکٹر سعدیہ کمال)